Los equipos asturianos de Segunda RFEF van compartir grupu colos madrilanos

El 1 va tar formáu por Asturies, Galicia, Comunidad de Madrid, Lleón y Castilla, cola esceición del Numancia y el filial del Burgos CF.

Los clubes de Segunda RFEF y la Real Federación Española de Fútbol aconceyaron esta mañana pa votar les diferentes propuestes de composición de los cinco grupos de 18 equipos pa la campaña próxima. Los asturianos, que contaben xuntase con Galicia y Cantabria, finalmente van tener qu'entamar cuatro desplazamientos a la Comunidad de Madrid, lo qu'aumenta los gastos al tar obligaos a facer nueche al ser l'horariu habitual de xuegu los domingos a les 12 hores.

Por un votu namái (43 a 42) trunfó la opción que dexa nel grupu 1 al UP Langreo, Club Marino, UC Ceares, Llanera y Avilés Industrial colos 6 gallegos (Pontevedra, Coruxo, Compostela, Begantiños, Arenteiro y Arosa SC) y col Unión Adarve, Leganés B, CD Móstoles URJC y Navalcarnero, amás del Salamanca CF, el Cristo Atlético y la Gimnástica Segoviana. El Numancia, que quedaba descolgáu, va colos catalanes y aragoneses, mentes que los cuatro conxuntos cántabros queden nel grupu vascu, al igual que'l Burgos Promesas.

La competición va principiar el 5 de setiembre. El campeón va xubir de manera direuta a Primera RFEF y los cuatro siguientes van xugar les eliminatories pol ascensu del 22 al 29 de mayu, mentes que los cinco últimos van perder la categoría y los cuatro peores decimoterceros van xugar un duelu pola permanencia.