Puesta en marcha'l programa de xeolocalización d'osos pardos con exemplares avezaos a la presencia humana

El Gobiernu d'Asturies va poner en marcha'l programa de xeolocalización d'osos pardos con aquellos exemplares avezaos a la presencia humana y que presenten conductes repitíes d'acercamientu a núcleos habitaos. La midida va tomase cuando'l restu d'acciones pa tornar estos exemplares recoyíes nel Protocolu pa la intervención con osos nel cordal cantábricu nun surtan efectu.

L'empiezu del marcaxe n'Asturies foi aprobáu güei pol grupu de trabayu del osu pardu cantábricu, integráu por Asturies, Galicia, Castiella y Llión, Cantabria y el Ministeriu pa la Transición Ecolóxica y el Retu Demográficu. El programa de xeoposicionamientu utiliza tecnoloxía vía satélite (rede Iridium), que dexa realizar un siguimientu continuu de los exemplares escoyíos.

El dispositivu asitiáu nel animal emite una señal col so allugamientu y tamién avisa cuando entra nuna zona delimitada, a manera de corralada virtual. Esto favorez una actuación más rápida de los axentes del Mediu Natural y una aplicación más eficiente de métodos disuasorios pa provocar una repuesta de deshabituación de los osos. 

Amás, el siguimientu activu va dexar llograr información sobre'l comportamientu de los animales y verificar la efectividá de les midíes utilizaes. Los primeros marcaxes van realizase nel suroccidente, onde se concentra la población más numberosa d'osos del cordal. 

La implantación de dispositivos de siguimientu n'exemplares avezaos sigue un protocolu estrictu d'intervención veterinaria validáu por espertos a nivel nacional y que yá s'utilizó n'otros casos, como los de los dos esbardos reintroducíos nos Picos d'Europa y nel Parque Natural de Redes.