Salú entama a citar al grupu d'edá de 40 a 49 años pa vacunase

Esti miércoles rexistráronse 56 casos nuevos y 2 finaos depués de diez díes ensin muertes.

El Serviciu de Salú del Principáu d'Asturies (SESPA) entamó cola citación de les primeres persones nacíes nel añu 1972, que correspuende al grupu d'edá 10 descritu na 'Estrategia Nacional de Vacunación', el de los ciudadanos de 40 a 49 años. Esti avance nel procesu de vacunación coincide cola llegada del segundu mayor unvío de vacunes de la campaña, con 101.100 dosis, de les que 58.500 son de Pfizer/BioNTech, 6.600 de Moderna y 7.200 de Janssen y 28.800 de AstraZeneca, preparáu esti últimu que nun s'aplica a menores de 60 años.

A falta de la espublización de los datos oficiales de la COVID-19, la Conseyería de Salú informó de la detección de 56 casos nuevos ayeri –l'actualización reduz el total en 1 casu por un duplicáu en díes anteriores–. Son 18 más que'l martes, cuando s'informó de 38.

Tasa de positividá diaria del 2,34 por cientu

Fixéronse 2.860 pruebes de diagnósticu d'infeición activa, polo que la tasa de positividá diaria s'asitió nel 2,34 por cientu, pol 1,96 por cientu del día anterior con 2.956 tests realizaos. A 7 díes esti porcentaxe enantes de l'actualización yera del 3,07 por cientu –ayeri xubió al 3,1 por cientu–.

Finaron dos homes de 95 y 88 años cola enfermedá causada pol coronavirus SARS-CoV-2, aumentando asina'l total de muertes nel andanciu a 1.972 –súmase otra más non contabilizada de díes previos al 22 de mayu–. Son les dos primeres depués d'enllazar diez xornaes ensin perdes humanes.

Hai 58 persones hospitalizaes con confirmación o sospecha de COVID-19, a los qu'hai que sumar 31 que tán na UCI. Son 8 y 2 menos que'l martes, de manera respeutiva.

15 biltos activos

Asturies informó a Sanidá de la esistencia de 15 biltos activos, 2 más que la selmana pasada, con un total de 139 casos. 4 d'ellos detectáronse estos 7 díes últimos, comunica la conseyería.

Na semeya, viales de la vacuna de Janssen, que tamién se destinará al grupu d'edá de 40 a 49 años.