Naia García, cola imitación d’Alexandra in Grey, merez la victoria nel V ‘Sácame pola pinta’

Con 9 años, la mierense Naia García proclamóse ganadora del V ‘Sácame pola pinta’, el concursu d’imitación d’artistes asturianos. La so interpretación del cantar ‘Give me’, d’Alexandra in Grey, convenció al xuráu, que contó esti añu cola novedá del votu popular, tomando parte 5.300 persones que siguieron la gala en direuto dende casa.

Doce neños y neñes d’ente 7 y 16 años defendieron los sos temes na final llueu d’algamar plaza na semifinal celebrada a lo primero del mes con dieciséis participantes, los que pasaron el corte d’ente los 43 presentaos. Coles entraes escosaes dende va selmanes, el Teatru Nuevu de La Felguera acoyó la gran gala, que tuvo un siguimientu en direuto de 5.000 persones pela rede.

Cada concursante tuvo qu’escoyer ún de los artistes y cantares propuestos pola organización, con temes como ‘Chacho’ de Los Berrones’, ‘La romería’ de Víctor Manuel o ‘Xota Ḷḷaron’ de L-R. El xuráu formáu David Varela, María Cotiello, Arantxa Nieto y Joaquín Pajarón decidióse finalmente pola actuación de García, neña que lleva dende los 6 años cantando n’inglés y que suaña con ser cantante y actriz.

Cola so victoria la mierense va poder grabar un discu promocional de cuatro temes del repertoriu del artista imitáu nel concursu entamáu pol Grupo A Mansalva en collaboración col Conceyu de Llangréu, amás d’un vale de 600 euros pa usar en Mundo PC. Tolos finalistes recibieron tamién 30 euros pa mercar nesti comerciu.