Xosé Bolado recibe la Medaya d'Oru de Xixón a títulu póstumu

L'escritor y académicu finó la selmana pasada.

La Xunta de Voceros del Conceyu de Xixón, presidida pola alcaldesa Ana González Rodríguez, decidió esta tarde por consensu la concesión de los Honores y Distinciones de la villa nesti añu 2021. Reconocimientos que se van entregar el 29 de xunu, San Pedro, xunto con los del 2020, yá que l'actu nun se pudo celebrar por mor de la situación sanitaria del momentu.

La Medaya d'Oru, a títulu póstumu, ye pa Xosé Manuel Bolado, escritor, académicu y estudiosu de la nuesa lliteratura nacíu n'Uviéu nel 1946 y vecín de Xixón. "A la hora de recordar a José Bolado nun debemos centranos namái nes sos facetes filolóxiques y lliteraries, tamién hai que falar de cómo llevó siempre a gala'l so irrenunciable compromisu éticu, qu'exerció cuando, recién estrenada la democracia, se punxo al frente del Atenéu Obreru", rescampló'l Conceyu, que recuerda tamién la donación l'añu pasáu a la ciudá del "mayor fondu documental qu'esiste actualmente en tol país, sobre Rosario de Acuña".

La Sociedad Astronómica Omega, el Centro Integrado de Formación Profesional del Mar y l'UC Ceares van recibir la Medaya de Plata, mentes qu'Antonio Suárez va ser declaráu Fíu Adoptivu. L'asturianu residente en México dende la década de los 70 ye presidente de Grupomar, empresa qu'encargó cinco atuneros a Armón.

Na semeya, Bolado nuna imaxe de mozu.