El preste pa recibir la segunda dosis d'AstraZeneca, pendiente del Comité de Bioética

Aprobóse pa los menores de 60 años, a los que, de primeres, va destinase Pfizer, anque'l Ministeriu de Sanidá treslladó l'asuntu a esti órganu. 77 contaxos rexistraos esti miércoles.

El Plenu del Conseyu Interterritorial del Sistema Nacional de Salud d'ayeri, tres sentir la opinión de la Ponencia Téunica de Vacunes y la Comisión de Salú Pública, dio'l preste a que los menores de 60 años vacunaos con Vaxzevria d'AstraZeneca pendientes de la segunda dosis reciban la Comirnaty de Pfizer/BioNTech. Tamién que, de manera esceicional, pueda pinchase otra vegada cola de la farmacética anglosueca firmando un documentu de consentimientu informáu de los efeutos secundarios posibles de la mesma.

Sicasí, el Ministeriu de Sanidá decidió treslladar l'asuntu al Comité de Bioética de España pa conocer el so posicionamientu al respeuto al considerar la so opinión "imprescindible". Hasta'l momentu refugara dafechu la posibilidá d'escoyer la vacuna que se recibe.

Aumenten los contaxos

A falta de la espublización de los datos oficiales de la COVID-19, la Conseyería de Salú comunicó la detección ayeri de 77 casos nuevos. Son 29 más que'l martes, cuando se rexistraron 48 contaxos.

Fixéronse 2.699 pruebes de diagnósticu d'infeición activa, polo que la tasa de positividá diaria asitióse nel 2,93 por cientu, pol 2,43 por cientu del día anterior, con 2.555 tests fechos. A 7 díes esti porcentaxe taba esa xornada nel 2,84 por cientu –ayeri xubió al 2,91 por cientu–.

Hai que llamentar la muerte de dos muyeres de 75 y 73 años cola enfermedá causada pol coronavirus SARS-CoV-2. Acumúlense 1.964 dende l'entamu del andanciu.

60 pacientes tán hospitalizaos con confirmación o sospecha de COVID-19, 8 menos que'l martes. Mentes, na UCI siguen otros 30 ingresaos.