“El conceptu ‘oficialidá amable’ lo que significa ye oficialidá consensuada y alcordada”, esplica Barbón

La vocera de Ciudadanos, Susana Fernández Álvarez, entrugó a Adrián Barbón en Plenu qué es la ‘oficialidá amable’ y los sos plazos y costos. El presidente aseguró nun poder detallalo porque “lo que significa ye oficialidá consensuada y alcordada”, y animó al so grupu a abandondar “l’inmovilismu” y incorporase a la negociación.

Tamién refugó llendar l’alderique sobre “la necesaria actualización del nuesu Estatutu d’Autonomía al conceptu o cuestión de la oficialidá; siendo necesaria, vustedes intenten reducilo a eso. Creo que ye un error. La reforma del Estatutu toca, el 15 d’avientu cúmplense 40 años de la aprobación pol Congresu de los Diputaos, y ye un procesu que, sí o sí, hemos afrontar”.

D’igual forma, recordó-y que la oficialidá ye un compromisu eleutoral de la FSA qu’ha de pasar per trés trámites, esto ye, l’aprobación de la reforma del Estatutu, l’aprobación pol Congresu y “l’aprobación de la llei que desendolque esi conceptu d’oficialidá amable”. Nesi puntu, llamó a Ciudadanos a participar nel procesu.

“Hai munchos bables”

Na réplica, Fernández Álvarez recordó’l refugu nel pasáu del socialismu asturianu a la oficialidá y la llamada del ex presidente Javier Fernández al ‘ABC’ recoyida por esti mediu dixital pa combatila dende Madrid, llegando a plantega-y a Barbón “una consulta ciudadana”. Darréu venceyó la normalización del idioma “con una perda irreparable de riqueza”, afirmando que “hai munchos bables”, y atrevióse a falar “de términos forciaos, que munches vegaes nin esisten”.

Nun faltaron les crítiques a la recuperación toponímica, col exemplu de Les Arriondes, asegurando que se tuvo que recuperar el castellanizáu ‘Arriondas’, nuna forma billingüe, “porque nin los vecinos nin los turistes conocíen el nome nuevu de Les Arriondes”. “Nosotros defendemos Asturies y la cultura asturiana, aseguro-ylo, y la nuesa llingua, queremos promovela y impulsala, pero non imponela”, finó depués d’esponer un mecigayu d’argumentos sobre supuestes consecuencies que tendría garantizar los derechos de los falantes d’asturianu.

“Complexu históricu”

Un soprendíu Barbón entamó la so respuesta asegurando que “un filólogu o un escritor, una persona que conoza’l mundu de la lliteratura, debe tar tirándose de los pelos sintiendo esi conceptu de que la normalización llingüística supón acabar cola realidá plural qu’esiste”. “Tien un problema cola llingua, ta claro”, siguió’l socialista, que dixo nun entender que Ciudadanos “en dalgunos sitios nun tengan problema nengún n’utilizar la llingua propia y equí haya esi complexu históricu en reconocer una realidá llingüística”, ampliando esti fechu a tola derecha de la Cámara y recordando la postura del PP de Galicia pa col gallegu.

“Vusté fixo referencia al mio antecesor y namái quiero face-y una aclaración: yo respeto fondamente a tolos mios antecesores, a tolos presidentes d’Asturies, de los que deprendí, pero yá que cita al mio mentor, el mio mentor llámase Pablo García Fernández, ye’l presidente d’honor de la Federación Socialista Asturiana, que si dalgo me deprendió hai munchos años ye que’l partíu, si quier siguir siendo útil a Asturies, tien qu’adaptase a la realidá social de cada tiempu”, añadió.

Semeya obra d'Armando Álvarez (recortada).