Los menores de 60 años vacunaos con AstraZeneca van recibir la segunda dosis de Pfizer

La Comisión de Salú Pública abre la puerta a la posibilidá d'escoyer de manera voluntaria l'alministración de la d'Oxford. 48 casos esti martes n'Asturies y nengún fináu.

El Ministeriu de Sanidá y les autonomíes decidieron ayeri, tres un llargu alderique, aprobar la puesta de la segunda dosis de la vacuna Comirnaty de Pfizer/BioNTech a los menores de 60 años que recibieron la Vaxzevria d'AstraZeneca y taben a la espera d'esta decisión que se fundamenta nel ensayu clínicu CombivacS desendolcáu pol Institutu de Salú Carlos III. Nun se conoz entovía'l resultáu del votu d'Asturies, onde hai 21.176 persones nesta situación, anque sí trescendió que la Comunidad de Madrid y Andalucía opunxéronse.

Sicasí, ye posible que se dea la opción a les persones a recibir la segunda dosis de la mesma vacuna. Esta tarde, a les 18 hores, hai un aconceyamientu telemáticu estraordinaria del Plenu del Consejo Interterritorial del Sistema Nacional de Salud nel que se va tratar esta alternativa.

Tasa de positividá diaria del 2,43 por cientu

A falta de la espublización de los datos oficiales de la COVID-19, la Conseyería de Salú informó ayeri de la detección de 48 casos nuevos –l'actualización incorpora 1 más non contabilizaos en díes anteriores–. Ye 1 más que'l llunes.

El Serviciu de Salú del Principáu d'Asturies (SESPA) fixo 2.555 pruebes de diagnósticu d'infeición activa, polo que la tasa de positividá diaria asitióse nel 2,43 por cientu, mui asemeyada a la de la xornada anterior, cuando foi del 2,41 por cientu con 2.652 tests realizaos. A 7 díes esti porcentaxe taba enantes de l'actualización nun 2,85 por cientu –ayeri baxó al 2,84 por cientu–.

Hai que celebrar l'ausencia de finaos nesti día. Hasta la fecha, dende l'entamu de l'andanciu, acumúlense 1.961 muertes –l'actualización suma 1 perda más non contabilizada en díes anteriores– cola enfermerdá causada pol coronavirus SARS-CoV-2.

La cifra d'ingresaos na UCI caltiénse con respeuto al llunes, 30, mentes qu'aumentó la de persones en planta con confirmación o sospecha de COVID-19. Pasó de 63 a 68.

Na semeya, preparación d'una dosis de la vacuna 'Comirnaty' de Pfizer/BioNTech en Noreña.