Ensin conceyos en nivel d'alerta 4+ depués de la salida de Llanes

El xueves sal de riesgu estremu. Nengún fináu esti martes, cuando se rexistraron 45 positivos.

Llueu d'encadenar siete díes con una incendencia acumulada a 14 díes menor a 325 casos cada 100.000 habitantes –el llunes taba en 223–, la Conseyería de Salú llevanta les restricciones del nivel d'alerta 4+ a Llanes, que tenía actives dende'l 23 d'abril. D'esta forma nun queda nengún conceyu con midíes esceicionales nun contestu d'ameyoramientu xeneral, cola incidencia baxando hasta los 92 casos nel país.

A falta de la espublización de lo datos oficiales de la COVID-19 correspondientes a ayeri, la Conseyería de Salú avanzó 45 contaxos na xornada –l'actualización suma 2 más por positivos non contabilizaos el llunes–. Son 6 menos que'l día anterior.

El Serviciu de Salú del Principáu d'Asturies (SESPA) fixo'l martes 2.170 pruebes de diagnósticu d'infeición activa, polo que la tasa de positividad s'asitió nel 2,03 por cientu. A 7 díes esti porcentaxe yera'l llunes del 2,83 por cientu –ayeri baxó al 2,78 por cientu–.

Nun se rexistró nengún fináu, polo que'l númberu de muertes nel andanciu sigue en 1.954. Hai 94 pacientes hospitalizaos con confirmación o sospecha de COVID-19, 21 menos que'l día anterior, mentes que siguen ingresaos na UCI otros 39.

Na imaxe, Llanes. Semeya obra de Tomás Senabre baxo llicencia CC BY-SA 2.5 ES.