La lletra de 'Indios' y la reclamación d'oficialidá sonaron nel Congresu

Sofía Fernández Castañón y Daniel Ripa emplegaron l'asturianu na Cámara Baxa.

Ayeri votóse la toma en consideración de la Proposición de Llei d'Universalización del Derechu a l'Asistencia Sanitaria Pública presentada pola Xunta Xeneral y impulsada por Gaspar Llamazares (Izquierda Xunida) la llexislatura pasada, aprobada'l 24 de marzu del 2017 como respuesta al Decretu Llei 16/2012 del Gobiernu del popular Mariano Rajoy que llendaba l'accesu universal a la sanidá pública, y que llegó entovía agora al Congresu pola paralís de l'actividá parllamentaria poles convocatories eleutorales que retrasó la so tramitación. Acudieron a Madrid a defendela María Dolores Carcedo (PSOE), Ovidio Zapico (IX) y Ripa (Podemos), que na so intervención fixo usu de la llingua asturiana.

"Güei Asturies vien a esti Parllamentu a blindar la Sanidá y les lleis sanitaries en tol territoriu español, pa tol mundu, ensin escuses. Y tamién vien a dicir qu'hai vida pa más allá de Madrid, qu'España nun acaba na llende de la capital como quieren facer entender dellos y delles, que'l centralismu produz monstruos y que necesitamos un sistema que dialogue colos sos territorios". Llueu, en representación de Xuníes Podemos, Castañón baxó a la tribuna d'oradores lluciendo la camiseta col corazón y la pallabra 'Oficialidá' que sacó la Xunta pola Defensa de la Llingua Asturiana con motivu de la concentración del sábadu y la campaña prevista pa estos meses, y comenzó recitando parte del cantar 'Indios' de Dixebra, con lletra de Xandru Fernández.

"Fuéremos d'onde fuéremos, estremeños o africanos, al final obreros asturianos. Ente hermanos de mugor nun hai res de diferencia, pal capital somos toos indios de la mesma tierra", citó apuntando qu'estes pallabres "definen perfectamete la identidad, la manera de ser, de manera de entender la vida comunitaria, solidaria y defensora de los principios universales de los derechos humanos". Tamién emplegó la parte final de la so intervención pa espresar que "agora namás quixere que'l próximu testu que llegue a esta Cámara dende la Xunta Xeneral del mio país seya la reforma del Estatutu, onde se garanticen los nuesos derechos como falantes porque tea escrito bien nidio que l'asturianu ye llingua oficial. Yá, yá, yá, oficialidá. Xa, xa, xa, oficialidá".

El diputáu asturianu de VOX, José María Figaredo, siguiente en tomar la pallabra, atrevióse a dicir que Castañón emplegó "una llingua más o menos inventada" faciendo referencia al eonaviegu "xa", al que se refirió como si fora asturianu.

Refugada

La propuesta de la Xunta Xeneral algamó'l refugu de la Cámara con 252 votos en contra –los del PSOE, el PP, VOX, Foro y los diputaos de Ciudadanos Pablo Cambronera y d'En Comú Podem María del Mar García Puig–, 48 a favor y 32 astenciones, fórmula emplegada por Xuníes Podemos, a esceición de Castañón y d'Ione Belarra, qu'optaron pol 'sí'. Munchos parllamentarios consideraron la propuesta estemporánea al quedar eliminaos los aspeutos más restrictivos del Decretu Llei 16/2012 pol 7/2018 llueu de llegada al Gobiernu del socialista Pedro Sánchez al traviés d'una moción de censura.