El Día de les Lletres Asturianes gana repercusión

Políticos, entidaes deportives, conceyos, centros asturianos, ciudadanos... Foron munchos los mensaxes que se llanzaron esti añu con motivu de la gran fiesta de la nuesa lliteratura.

El vienres foi'l XLII Día de les Lletres Asturianes, una celebración que nestos últimos años ta ganando presencia nos medios de comunicación y tamién nes redes sociales, vía más emplegada güei pa llanzar mensaxes tanto por parte de persones como de coleutivos. Asina les referencies a la xornada foron continues, sobre manera en Twitter.

Esta rede usóla'l presidente Adrián Barbón pa esclamar "Día de les Lletres Asturianes" xunto con trés corazones azules y mariellu formando los colores de la bandera del país, mesma opción utilizada pol secretariu xeneral de Foro, Adrián Pumares, xunto con un "Prestosu #DiadelesLletresAsturianes". Pela so parte, el secretariu xeneral del PP, Álvaro Queipo, escribió, en castellanu, "recuerdu y reconocimientu al llabor del Gobiernu del PP de Sergio Marqués, qu'aprobó la Llei d'Usu y Promoción del Asturianu, asegurando la so sobrevivencia y difusión hasta güei", pa finar con un "¡Feliz Día de les Lletres Asturianes!" y un "¡Feliz Día das Lletras Asturianas!".

Nun foron los únicos, yá que la llista de políticos ye bien llarga, con mensaxes de Sofía Fernández Castañón (Podemos), Ángela Vallina (IX), Laura Tuero (Podemos Xixón)... Les formaciones polítiques y munches de les sos agrupaciones llocales tampoco nun dexaron pasar la oportunidá d'escribir al respeuto dende les sos cuentes oficiales.

Uviéu y Sporting

Pola so gran repercusión, inclusive fuera de les nueses llendes, hai que rescamplar la referencia a la xornada del Uviéu, tanto'l masculín como l'Oviedo Moderno, al que se sumó nesta ocasión el Sporting. L'UP Langreo, l'UD Gijón Industrial, el Rosal, el Stiaua d'Asturies o'l Círculo Gijón Baloncesto tamién asoleyaron mensaxes, mentes que l'UC Ceares amplió'l suyu a tola Selmana de les Lletres Asturianes.

El Centro Asturiano de Barcelona, el Conceyu de Bimenes o Villaviciosa, la Fundación José Cardín, Turismu Xixón, coleutivos de fuera como l'aragonés Nogará Religada o Escola Valenciana y munchos ciudadanos de dientro y fuera del país tampoco nun duldaron en facer una referencia a un Día de les Lletres Asturianes que gana pesu añu tres añu.

Xunto a la mar
d’aquellos branos,
pel sable como alfombra persa
yeres armonía d’anxélica sirena.
Pablo Ardisana (1940-2017) #DiaDeLesLletresAsturianes #XixónEnTolesOcasiones pic.twitter.com/Bfue49qZ9W

— Turismo Gijón/Xixón (@GijonTurismo) May 7, 2021