51 casos nuevos esti llunes, con una tasa de positividá diaria del 2,59

Finó un home de 83 años nesta xornada.

A falta de la espublización de los datos oficiales de la COVID-19, la Conseyería de Salú informó de la detección de 51 casos nuevos ayeri –l'actualización rexistra 50 por un duplicáu en díes anteriores–. Son 14 más que'l domingu, cuando se fixeron 1.589 pruebes de diagnósticu d'infeición activa, polo que la tasa de positividá diaria quedara nun 2,83 por cientu.

Ayeri, mentes, realizáronse 2.467, asitiándose esi porcentaxe nun 2,59 por cientu. A 7 díes, el domingu taba nun 3,03 por cientu –baxó a un 2,83 por cientu ayeri–.

Depués d'una xornada ensin finaos, hebo que llamentar una, la d'un home de 83 años. Ye la 1.954 del andanciu.

115 pacientes tán hospitalizaos con confirmación o sospecha de COVID-19, a los qu'hai que sumar otres 39 persones ingresaes na UCI. Son 14 y 2 menos que'l domingu, de manera respeutiva.

Na imaxe, dalgunos de los viales de vacunes 'Comirnaty' de Pfizer/BioNTech recibíes ayeri pol SESPA, un total de 46.800 dosis.