Dexónos a los 100 años Diamantina Rodríguez

Referente de la canción asturiana, la de Viḷḷaxime foi una muyer pionera na escena y un exemplu pa xeneraciones d'intérpretes.

En Noreña, na residencia onde vivía, finó ayeri Diamantina Rodríguez a los 100 años d'edá. Un sieglu dedicáu a la música y a la tonada.

Nacida en setiembre del 1920 na población quirosana de Viḷḷaxime, pronto averóse a la canción asturiana con Obdulia Álvarez 'La Busdonga' como espeyu onde mirase. Participaría en numberosos concursos, enllenando l'escenariu cola so voz y bon facer, hasta ganase pronto un nome na escena.

El so primer discu grabólu nel añu 1969 y dos años depués, en Plenu franquismu, dedicaría un álbum al exiliáu Eduardo Martínez Torner. Ente les sos composiciones los espertos rescamplen 'Arboleda bien plantada', un cantar que ye yá un clásicu del xéneru.

Nel añu 2002 Rodríguez recibió la medaya de plata d'Asturies en reconocimientu a la so trayeutoria y llabor. A lo llargo de la mañana son munchos los músicos y estudiosos de la tonada los que recordaron con bones pallabres a la quirosana, asina como coleutivos como la Xunta pola Defensa de la Llingua Asturiana y Iniciativa pol Asturianu, llamentando la so perda, un pésame al que se suma esti diariu dixital.

Na imaxe, Rodríguez nuna participación na gala '90 cumpleaños de Diamantina' celebráu nel Auditoriu Teodoro Cuesta de Mieres en setiembre del 2010 y emitida pol programa 'Sones' de TPA.