116.552 asturianos yá tienen la pauta completa de vacunación

Ye un 12,93 por cientu de la población diana. El llunes rexistráronse 117 casos nuevos.

Esta mañana aportaron a Asturies 7.400 dosis d'AstraZeneca, que se sumaron a les 38.610 de Pfizer/BioNTech recibíes ayeri, pa siguir cola campaña de vacunación. Ún de cada cuatro asturianos yá tenía ayeri una de les dos puestes necesaries, un  26,19 por cientu de la población total, qu'aumenta al 29,61 de la población diana –los ciudadanos que formen parte de los grupos prioritarios, tomando esti datu como referencia pal repartu de les vacunes–.

Con pauta completa yá hai 116.552 asturianos, un 11,44 por cientu de los habitantes d'Asturies y un 12,93 por cientu de la población diana. La inmunización máxima de la vacuna llega a la selmana de la segunda dosis.

Un fináu

A falta de la espublización de datos oficiales de la COVID-19, la Conseyería de Salú informó de 117 contaxos ayeri –l'actualización incopora 12 más, hasta 129, non contabilizaos en díes anteriores–. Son 11 más que'l domingu, cuando hebo 106.

El Serviciu de Salú del Principáu d'Asturies (SESPA) fixo 2.975 pruebes de diagnósticu d'infeición activa, polo que la tasa de positividá s'asitió nel 5,65 por cientu, inferior a la xornada anterior, cuando quedó nun 6,76 por cientu y el porcentaxe a 7 díes esti porcentaxe'l yera del 5,77 por cientu –ayeri baxo al 5,67 por cientu–. Hai que llamentar la muerte d'un home de 77 años cola enfermedá causada pol coronavirus SARS-CoV-2, la 1.936 del andanciu –la revisión de datos suma otra más hasta 1.937–.

171 pacientes tán hospitalizaos con confirmación o sospecha de COVID-19, a lo qu'hai que sumar otres 69 persones ingresaes na UCI. Son 1 y 4 menos que'l domingu.

Na semeya, una muyer del grupu d'edá de mayores de 90 años recibe la so segunda dosis de la vacuna Comirnaty de Pfizer/BioNTech esta mañana en Riosa, onde se vacunaron otres 259 persones de más de 70 años.