Dani Álvarez: “Dempués d’estos años d’esperiencia y aprendizaxe quiero facer un discu en solitariu”

Ye cuasi interminable la llista de collaboraciones y grupos que contaron cola aportación de Daniel Álvarez Mora (Uviéu, 1983) nesti tiempu: Forgaxa, Tarañu, Gueta na Fonte, Banda Gaites Llacín, Nuberu… El músicu criáu en Santa Cruz (Mieres) cumplió recién 30 años na escena, sigue tocando con Corquiéu, D’urria, P’amusquis y Figos de Tuna, y anuncia un trabayu con temes propios.

¿Cómo recuerda aquella primer vegada, en marzu del 1991, cola gaita y con Hevia de maestru?

La primer clas con José Ángel recuérdola como qu’ellí me dexó mio ma con un home que tocaba un instrumentu que metía munchu ruíu y a min dábenme ganes d’escapar d’aquel aula. Siempre fui un neñu mui roceanu a coses que sonaren estridentes. La gaita lóxicamente, yera una d’elles. Tolos años xubimos a Morea d’Ayer a comer les fabes de mio güela na fiesta de Samartín. Aquello de ver gaiteros per toles esquines yera una llocura, pero col pasu’l tiempu garré-y el gustu y a vegaes soi ún d’ellos na fiesta.

La primer actuación foi en Santa Cruz un añu depués.

Con pocos meses d’esperiencia, un repertoriu limitáu, nervios, pero con muncha ilusión por estrename nel pueblín, nunes fiestes de la Cruz de mayu, que naquel entós yeren mui potentes, siendo’l pistoletazu de salida d’ún pregón enllenu xente conocío ente’l públicu del prau del Molineru.

Taba anunciáu nel porfoliu como, “el niño Daniel”. Quedóme grabao y yera la chancia ente collacios años dempués.

Depués llegó una trayeutoria mui amplia.

Entamé nel mundiu de les bandes de gaites –y sigo enredando nél– como casi tou gaiteru que se precie n’Asturies, y a puquitinos, fui conociendo otros instrumentos y otros estilos musicales, siempre enmarcaos dientro de la música de raigón. Instaláu n’Uviéu con 18 años, fui metiéndome nesti mundu y desendolcando’l mio llabor como miembru activu o collaborador de dellos grupos y artistes.

Echando la mirada atrás, ¿qué balance fai d'estos 30 años na música?

Tengo poca quexa. Facer la música que te presta, siendo consciente de tar calteniendo una cultura, una tradición y una hestoria, entá viva n’Asturies, conocer xente que se dedica a lo mesmo y que terminen por ser el to círculu estrechu d’amistaes, viaxar y conocer mundiu, deprender y enseñar, tocar con xente a la que sigues y almires dende años atrás, pisar escenarios enxamás suañaos…

Una suerte impagable. Tamién teo que puntualizar que me tocó vivir los años de lo que dalgunos llamen ‘la burbuya del folk’.

¿En qué proyeutos ta agora?

Anguaño tamos n’activu con Corquiéu y D’urria, dos bandes coles que pensamos en discu nuevu dende fai tiempu. Tamién con P’amusquis y el tríu Figos de Tuna, formaciones pequeñines, d’estremaos estilos y creo que perinteresantes.

Vien xubiendo pieces a redes sociales. ¿Ye una manera de tener actividá musical nestos tiempos de pandemia?

Vengo faciéndolo de xemes en cuando dende va años, pero col confinamientu gordu del 2020 vime na necesidá d’echar les hores muertes naquellos interminables díes de zarramientu en daqué que fuere productivo. Y grabar con ún de los mios ídolos musicales, Michael McGoldrick, anque seya de manera telemática, yera una asignatura pendiente.

Amás, siempre me llamó l’atención el mundiu de les cámares, la edición de vídeu y tolo que tenga que ver col campu audiovisual.

¿Ta afeutando-y esta situación?

La situación ta afeutándonos a toos, nel sentíu de qu’un músicu siente la necesidá de treslladar el so trabayu, los sos conocimientos y la so manera de ver y sentir la música, al traviés d’ún micro, nun bon escenariu y con un públicu agradecíu aplaudiéndote.

Les ayudes económiques tán bien, cómo non, pero nun suplen les ganes qu’hai por facer esfrutar a la xente dende un patiu butaques o un prau. Coles midíes de seguranza pertinentes, de xuru que podemos facer por qu’espoxigue pocu a pocu l’actividá.

¿Qué planes tien pal futuru?

En madurando y rematando les igües nel estudiu de casa, quiero facer un discu en solitariu. Dempués d’estos años d’esperiencia y aprendizaxe, creo que vien siendo’l momentu de da-y forma a dellos de los temes que se lleven cocinando nes maquetes caseres hai bien de tiempu. Sedrá un discu-documental.

Esti cursu tamién fino’l Grau Profesional pola especialidá de Gaita nel Conservatoriu d’Uviéu, col mayestru gaiteru Flavio R. Benito.