Iniciativa reclama a Educación que garantice'l valor de los títulos de certificación del idioma

Cree "incomprensible" que "nun reconoza nin dea valor a los propios títulos qu'entama".

Iniciativa pol Asturianu reaicionó tamién a la denuncia fecha pol Sindicatu Unitariu Autónomu de los Trabayadores de la Enseñanza d'Asturies (SUATEA) pol refugu por parte de la Conseyería d'Educación de la inclusión de la prueba de certificación de nivel intermediu B2 adaptáu al Marcu Común Européu de Referencia pa les Llingües, celebráu nel pasáu mes d'ochobre, a dellos docentes nel so rexistru personal de formación permanente. "Resulta incomprensible que los títulos puedan ser otorgaos al traviés d’una convocatoria oficial de la Conseyería d’Educación y de la Universidá d’Uviéu pero que, al mesmu tiempu, la mesma nun reconoza nin dea valor a los propios títulos qu’entama la propia conseyería", afirma esti coleutivu.

"Ún de los aspectos más interesantes d’alcanzar esti nivel pa la llingua asturiana ye llograr esa certificación oficial y esa valoración nuna oposición pública. Ye dicir, cuntar con esa competencia llingüística tien que traducise en que seya valorada positivamente", añade al tiempu que considera que dicha valoración "ye una manera más de dar valor al conocimientu y aprendizaxe del idioma, amás de llograr la igualdá col restu de llingües con titulación oficial del Marcu Européu. Amás, esta homologación de los títulos otorgaos podría garantizar una normalización de la llingua al xunír el conceptu d'asturianu col conceptu de competencia llaboral".

Poro, pide "una solución urxente pa la valoración oficial de los títulos qu’entama la propia Conseyería d’Educación, y un trabayu alministrativu y normativu pa llograr esa certificación oficial que garantice’l valor del títulu".