La flexibilización de les midíes aporta con tendencia ascendente de contaxos: 161 el xueves

La tasa de positividá diaria queda nel 4,77 por cientu. Siero abre la movilidá'l sábadu, mentes que Mieres torna al zarru perimetral el domingu.

Esta medianueche finen les restricciones especiales de Selmana Santa y entren a valir les nueves, más flexibles que les anteriores: retrásase'l toque de queda de les 22 a les 23 y permítese l'apertura de la hostelería en terraces hasta les 23 hores –auméntese les persones per mesa de 4 a 6– y n'interiores hasta les 21, cuando hasta güei se pesllaba a les 20 hores en dambes zones. El Gobiernu da esti pasu nuna selmana d'aumentu progresivu de los positivos de COVID-19 al rexistrase 96 el llunes, 121 el martes, 146 el miércoles y 161 ayeri.

Nesta xornada última fixéronse 3.879 pruebes de diagnósticu d'infeición activa, polo que la tasa de positividá s'asitió nel 4,77 por cientu, inferior a la del día anterior, cuando foi del 5,06 por cientu. A 7 díes, esti porcentaxe yera'l miércoles del 4,96 por cientu.

Hebo que llamentar una muerte na xornada, la d'un home de 88 años. Dende qu'entamó l'andanciu finaron cola enfermedá causada pol coronavirus SARS-CoV-2 un total de 1.920 persones.

Hai hospitalizaos 151 pacientes con confirmación o sospecha de COVID-19, 10 menos que'l miércoles. A ellos hai que sumar los 65 que tán na UCI, 2 más que'l día anterior.

Mesmu toque de queda en 4+

L'empeoramientu de la situación epidemiolóxica en Mieres lleva a esti a conceyu a pasar a riesgu estremu. Asina'l domingu la Conseyería de Salú activa'l so zarru perimetral y les midíes del nivel d'alerta 4+, como'l pieslle de los interiores de los chigres, per 14 díes.

Sal d'ésti Siero, dende'l sábadu, que cumple namái la primer metá de la prórroga tres ameyorar los sos datos. Amás de Mieres, sigue coles restricciones más riguroses Llangréu, conceyos que, sicasí, van tener los mesmos horarios de toque de queda y apertura de les terraces de la hostelería que'l restu del país.

Pa consultar los indicadores de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Apertura en centros de mayores

Mañana tamién se flexibiliza, sacante los territorios de 4+, la situación de los residentes en centros de mayores. Éstos van tener horarios más amplios de salida y van poder recibir más visites, asina como usar espacios comunes, amás de que va principiar la tramitación d'ingresos nuevos.

Na semeya, la conceyala de Salú, Teresa Iglesias; el vicealcalde, Manuel Ángel Álvarez; y l'alcalde, Aníbal Vázquez, siguen los datos del conceyu nel alcuentru telemáticu colos responsables de la Conseyería de Salú nel que se comunicó'l pasu al nivel d'alerta 4+.