TPA estrena una serie de vídeos curtios “pa convidar a la observación del nuesu patrimoniu industrial”

‘50 semeyes del patrimoniu industrial d'Asturies’, otru de los proyeutos escoyíos na convocatoria ‘Asturies crea cultura / Asturies crea sinerxes’ , va estrenase esti xueves en TPA col episodiu dedicáu al Pozu San Fernando. Son 50 pieces d’al rodiu un minutu de llargor “pa convidar a la observación del nueu patrimoniu industrial”, apunta Marta F. Crestelo, de la productora Freews.

“El telespectador va deprender sobre una parte tan importante de la nuesa historia como ye la industrial, que marcó’l nuesu paisaxe y el nuesu paisanaxe”, rellata la impulsora d’esta empresa dedicada al cine independiente xunto con Marcos M. Merino, que nos años últimos ta desendolcando’l proyeutu ‘Patrimoniu Industrial’, una ayalga que recueye n’asturianu, castellanu y inglés el nuesu pasáu venceyáu al trabayu. Un proyeutu nel que vienen participando 33 profesionales asturianos de la divulgación, l'arte o la teunoloxía, ente ellos 17 investigadores reconocíos del patrimoniu industrial d'Asturies.

“Va conocer tamién auténticos fitos de la inxeniería que se dendolcaron n’Asturies, como pueden ser les centrales hidroeléctriques”, ensin escaecer otros elementos venceyaos a la siderurxa, la minería, la industria química o’l tren. Asina, el Pozu San Fernando, n’Uriés (Ayer), va protagonizar el primer capítulu, que se va estrenar mañana a les 7.59 hores, pa repetise a les 9 hores y a les 5.05 hores del vienres, cuando se va pasar el segundu episodiu, el de la mina d’Arnáu, en Castrillón, a les 8 y a les 8.56 hores.

Depués de la Selmana Santa la previsión ye que les ‘50 semeyes de patrimoniu industrial’ se puedan ver depués del informativu matinal, amás de n’otros momentos de la programación como continuidá. “Un minutu al día qu’acabarán siendo 50 minutos cola intención de xenerar interés y dignificar lo propio, que creemos que ye una manera d’alimentar l’autoestima coleutiva”, rescampla Crestelo, qu’apunta que les imáxenes con rótulos n’asturianu –y voz n’off qu’incorpora la TPA– “conviden a la observación y conocimientu históricu del nuestu patrimoniu industrial”.

Ente la llista de mediu centar d’allugamientos que van apaecer nesta propuesta, una de les siete escoyíes na convocatoria ‘Asturies crea cultura / Asturies crea sinerxes’ entamada pola Conseyería de Cultura, Política Llingüística y Turismu y RTPA pa la ellaboración de conteníos n’asturianu nel ente públicu de comunicación, atopamos tamién la mina de Texeo, les naves de llaminación na factoría d’ENSIDESA d’Avilés, los talleres del Conde en La Felguera, la central hidroeléctrica de Salime, la nave de Cristasa en Xixón, la rampla de Payares y la historia de delles llocomotores y coches que circularon peles víes del país, el puertu carboneru de San Esteban, el pobláu obreru de Llaranes o la Escuela de Formación Profesional de Trubia. Cincuenta pieces que van provocar al telespectador un aproximamientu emocional y históricu a llugares entá presente na memoria coleutiva de los asturianos.

Na imaxe, un fotograma del capítulu dedicáu al Taller de Cañones de la Fábrica d'Armes d'Uviéu.