Pablo Iglesias abandona la vicepresidencia segunda del Gobiernu y da'l relevu a Yolanda Díaz

El líder de Podemos aspira a la presidencia de la Comunidad de Madrid tres l'adelantu eleutoral decidíu pola popular Isabel Díaz Ayuso.

"Voi presentame a les eleiciones del 4 de mayu", confirmó nun videu de 8 minutos de llargor tres 5 minutos de valoración de los llogros de Xuníes Podemos nel Gobiernu y d'emponderamientu de Yolanda Díaz Pérez, y d'alerta del peligru de la ultraderecha. "Un militante ha tar ellí onde ye más últil en tou momentu", siguió al tiempu que treslladó'l so deséu de "construyir una candidatura d'izquierda fuerte y amplia pa impidir que la ultraderecha s'apodere de les nueses instituciones y ganar el Gobiernu de la Comunidad de Madrid", pa lo que yá se punxo en contautu con Más Madrid.

Esti movimientu conlleva la so salida de la vicepresidencia segunda del Gobiernu y l'abandondu del Ministeriu de Derechos Sociales y Axenda 2030, que se va facer efeutivo nel entamu de la campaña eleutoral. Iglesias apuntó que treslladó Pedro Sánchez que la so cartera diría pa Ione Belarra, mentes que'l so puestu na vicepresidencia sería pa Díaz, anque la decisión última ye del presidente.

"Próxima presidenta del Gobiernu d'España"

"En política hai que tener valentía, valentía pa dar les batalles qu'hai que dar y tamién pa ser quien a entender cuándo llega'l momentu de dar pasos a nuevos lideralgos", espresara previamente nel videu, pa depués citar a la gallega, "la meyor ministra de Trabayu de la historia". "Yolanda Díaz pue ser la próxima presidenta del Gobiernu d'España", aseguró darréu, proponiéndola como la so sustituta na candidatura de Xuníes Podemos.

Na semeya, Iglesias y Díaz nuna xunta telemática Conseyu de Ministros d'Emplegu, Política Social, Sanidá y Consumu de la Xunión Europea en xunu.