Iniciativa pol Asturianu empondera “l’apertura al diálogu sobre l’idioma de Queipo y la direición nueva del PP”

Esti miércoles representantes d’Iniciativa pol Asturianu aconceyaron n’Uviéu col secretariu xeneral del Partido Popular (PP), Álvaro Queipo, na primer cita d’una ronda de xuntes con partíos del arcu parllamentariu. Esti coleutivu rescampla’l cambiu esistente con respeuto a la direición antigua del partíu que presidía Mercedes Fernández.

“En diez años nunca nos recibieron, sacante dalgún alcuentru de manera particular o en Madrid nes nueses visites a congresistes y senadores”, recuerda Inaciu Galán, responsable de Relaciones Institucionales d’Iniciativa pol Asturianu, presente nel aconceyamientu xunto col presidente Iván Llera y Xuan Pandiella. Por parte popular, Queipo tuvo acompañáu por Matías Rodríguez Feito, vicesecretariu de Bienestar Social y Cultura.

“Salimos mui satisfechos, con una sensación distinta, magar les diferencies esistentes”, esplica Galán, qu’empondera “l’apertura al diálogu sobre l’idioma de Queipo y la direición nueva del PP de Mallada”. Na cita los representantes d’Iniciativa pol Asturiano trataron de diferentes cuestiones relatives a una posible reforma estatutaria y sobre la situación actual del asturianu y el gallego-asturiano, animando al principal partíu de la oposición a tener una posición coherente al respeuto pa cuntar d’esta manera cola mesma postura que col restu de llingües d’España.

L’exemplu de Galicia, onde’l PP gobierna y sofita ensin problema nengún el gallegu, salió nel alderique. “L’asturianu ye un patrimoniu cultural de tola ciudadanía y que nun ye nin d’izquierdes nin de dreches. Ye un deber de toos y toes cuidalu, mantenelu y tresmitilu a les xeneraciones nueves pa consiguir caltener la tresmisión xeneracional y siguir salvando l’idioma. En Galicia naide pensaría que la llingua propia ye d’una tendencia política d’un partíu, pues n’Asturies lo mesmo”, espresó Llera.

Nesi sen, Queipo, natural de Castropol y falante de gallego-asturiano, llingua que tien emplegada na Xunta Xeneral, nun ve con antipatía’l casu del país vecín. Por último, los representantes d’Iniciativa recordaron a los populares que “la oficialidá ye la ferramienta constitucional pa llograr la igualdá de drechos” y que “nun hai nada más constitucional que defender la oficialidá de la llingua asturiana”.

Cola vista puesta en setiembre

Esta xunta col PP ye la primera qu’entama Iniciativa pol Asturianu nuna ronda que va siguir esta tarde con alcuentros con Podemos Asturies y Podemos Xixón, y nes selmanes vinientes col restu de partíos en fecha por concretar. El compromisu algamáu ayeri colos populares ye’l de repetir aconceyamientu una vegada que finen estes xuntes pa siguir aldericando asina al respeuto.

“Ye un momentu complicáu pal Gobiernu pol tema l’andanciu, pero l’actividá parllamentaria ha siguir. El presidente marcó setiembre como fecha pa entamar col diálogu sobre la reforma estatutaria y el nuesu deséu ye entamar a falar dende yá d’ello, emburriar el procesu, averando postures ente partíos. La sociedá civil tien que participar de manera sosegada, tranquila y moderada”, apunta Galán, qu’entiende positivo que dicha reforma, “que se tien que dar nesta llexislatura porque dan los númberos pa ello”, incluya más aspeutos que la oficialidá del asturianu y del gallego-asturiano.

“Y el principal partíu de la oposición tien que participar nello”, añade en defensa d’un consensu al rodiu l’idioma pol qu’Iniciativa pol Asturianu va siguir trabayando estos meses.

Na semeya, Llera, Pandiella, Galán, Rodríguez Feito y Queipo nel aconceyamientu d'ayeri na sede del PP.