Cofiño valora que "nestos dos meses de vacunación s'evitaron 253 muertes"

El direutor xeneral de Salú Pública apuntó que'l 3,91 por cientu de la población d'Asturies yá ta vacunada. El llunes hebo 165 contaxos, con un 6,74 por cientu de positividá diaria.

Rafael Cofiño, el coordinador del Observatoriu de Salú n'Asturies, Mario Margolles, y el xefe del Serviciu de Vixilancia Epidemiolóxica, Ismael Huerta, valoraron esta mañana l'añu de presencia constatada del coronavirus SARS-CoV-2, que se cumplió ayeri, y la situación actual. "Nestos dos meses de vacunación evitáronse 253 muertes por mor del efeutu de la vacuna", rescampló responsable de Salú Pública.

En concretó cifró nun 7,8 por cientu los asturianos que participaron na campaña de la vacunación, mentes qu'un 3,91 por cientu yá recibió les dos dosis necesaries y tán inmunizaos contra la COVID-19 o a piques de talo. Margolles repasó les incidencies de les trés foles, confirmando la segunda como la más intensa, y Huerta afondó nos grupos de vacunación incidiendo en que la eficacia de los trés tipos de vacuna coles que cuenta anguaño Asturies "ye mui asemeyada", desacreitando asina les crítiques de dellos sectores que refuguen la d'AstraZeneca.

Cinco finaos

A falta de la espublización de lo datos oficiales de la COVID-19, la Conseyería de Salú informó ayeri de la detección de 165 casos nuevos –l'actualización suma 10 más de díes anteriores non contabilizaos hasta los 175–. Son 64 más que'l domingu, con una tasa de positividá del 6,74 por cientu, tamién superior a la del día anterior, cuando quedó nun 5,97 por cientu.

A 7 díes esti porcentaxe yera'l domingu del 5,51 por cientu, nuna tendencia qu'empieza a ser ascendente –como confirma l'actualización, qu'asitia esta tasa ayeri nel 5,88 por cientu–. La Organización Mundial de Salú (OMS) afita nun 5 por cientu la llende pa tener controlada la pandemia.

Hai que llamentar 5 muertes na xornada: trés muyeres de 90, 89 y 88 años y dos homes de 83 y 75, de los que nengún residia en centros de mayores. Dende qu'entamó l'andanciu finaron un total de 1.777 persones cola enfermedá causada pol coronavirus SARS-CoV-2.

El númberu d'hospitalizaos asciende a 279 con confirmación o sospecha de COVID-19 en planta y a 110 na UCI. Son 13 y 1 menos que'l domingu, de manera respeutiva.

Castrillón y Ayer abren la movilidá

Güei salieron del riesgu estremu Castrillón y Ayer, polo qu'abrieron el zarru perimetral y rebaxaron les restricciones. Agora son trés los conceyos que siguen en nivel d'alerta 4+: Corvera, Ḷḷena y Piloña.

Pa consultar la situación de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.