Les residencies nun rexistren biltos de COVID-19 per primer vegada n'ocho meses

El martes rexistráronse 159 contaxos, con una positividá del 5,18 por cientu, y 4 muertes.

La Conseyería de Salú nun detectó na selmana del 16 al 22 de febreru nengún biltu nes residencies del país. Ye la primer vegada que se da esti casu dende xunetu.

Les autoridaes sanitaries consideren qu'hai un brotu cuando se rexistren 3 o más positivos de COVID-19 nun centru de mayores. Asina hebo 2 na selmana anterior, con otros 17 casos confirmaos por PCR nos 270 espacios esistentes n'Asturies, qu'agora se reduz a 9 positivos.

Sigue baxando la presión hospitalaria

A falta de la espublización de los datos oficiales de la COVID-19, Salú informó de 159 contaxos ayeri. Son 34 más que'l día anterior, cuando hebo 125 –l'actualización sumó 2 más non contabilizaos en xornaes previes hasta 127–.

El Servicio de Salú del Principáu d'Asturies (SESPA) fixo 4.147 pruebes de diagnósticu d'infeición activa, polo que la tasa de positividá s'asitió nel 5,18 por cientu, superior a la del llunes, que foi del 4,62 por cientu. A 7 díes nesa xornada esti porcentaxe yera del 6,06 por cientu.

Finaron per segunda día siguíu 4 persones cola enfermedá causada pol coronavirus SARS-CoV-2, nesta ocasión trés homes de 77, 63 y 53 años y una muyer de 90, de los que nengún vivía en residencia. Dende qu'entamó l'andanciu la cifra total de muertos asciende a 1.737.

Por último, hai hospitalizaos 346 pacientes con confirmación o sospecha de COVID, a los qu'hai que sumar 117 que tán na UCI. Son 14 y 7 menos que'l llunes.

Corvera sal de les midíes esceicionales

Dos díes depués d'Avilés y Castrillón va salir Corvera de les midíes esceicionales por altu nivel de tresmisión del coronavirus SARS-CoV-2, esto ye de dende mañana, depués d'ameyorar los sos datos. D'esta forma namái queden coles restricciones más estrictes Ḷḷena y Ayer.

Abrieron güei la movilidá Uviéu, Gozón y Carreño, y Xixón podría ser la siguiente'l vienres. Mentes, dende güei incorpórase a la llista de 7 conceyos con nivel d'alerta 4+ Piloña.

Pa consultar la situación de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, un usuariu de la residencia xixonesa de Pumarín recibe la segunda dosis de la vacuna.