Salú informa de 183 casos nuevos de COVID-19

La tasa de positividá de la xornada asítiase nun 6,96 por cientu. Llaviana ye'l siguiente conceyu en salir del riesgu estremu.

La Conseyería de Salú comunicó 183 casos nuevos ayeri –l'actualización suma 2 más non contabilizaos hasta los 185–. Son 5 menos qu'ayeri, cuando s'informó de 188, anque l'actualización aumentó la cifra total hasta 194 por positivos non contabilizaos de díes anteriores.

Fixéronse 3.980 pruebes de diagnósticu d'infeición activa, polo que la tasa de positividá asitióse nun 6,96 por cientu, superior a la del miércoles, cuando foi del 6,75 por cientu. A 7 díes, esti porcentaxe na actualización última yera del 6,51 por cientu –tres la espublización de los datos oficiales, aumenta'l al 6,54 por cientu ayeri–.

Na xornada hebo que llamentar 8 muertes: seis homes de 90, 90, 88, 85, 65 y 62 años, y dos muyeres de 86 y 40, de los que nengún residía en centros de mayores. Dende qu'entamó l'andanciu finaron 1.707 persones –l'actualización última sumó 16 de díes anteriores non contabilizaos– cola enfermedá causada pol coronavirus SARS-CoV-2.

Hai hospitalizaos 412 pacientes con confirmación o sospecha de COVID-19, a los qu'hai que sumar los 127 que tán na UCI. Son 33 y 1 menos que'l miércoles.

9 conceyos en 4+

Salú decidió la salida de Llaviana del riesgu estremu tres 14 díes en zarru perimetral y con restricciones. Éstes van llevantase'l llunes.

D'esta manera namái queden nel nivel 4+ nueve conceyos: Uviéu, Gozón, Xixón y Carreño, amás d'Avilés, Corvera, Castrillón, Ḷḷena y Ayer, con midíes especiales al tener un nivel de tresmisión del coronavirus SARS-CoV-2 mui alta. Pa consultar la situación de tolos llugares y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

36 biltos activos

Asturies informó al Ministeriu de Sanidá de la esistencia de 36 biltos activos, 29 menos qu'hai una selmana, con un total de 431 casos. 11 d'ellos detectáronse estos 7 díes últimos, comunica la conseyería.

Na semeya, el ríu Nalón al so pasu per Llaviana, zona verde recuperada pol Conceyu.