Asturies suma cuatro xornaes con menos de 200 casos de COVID-19

El llunes rexistráronse 127 y el martes, 161, con tases de positividá inferiores al 6 por cientu. Cangas sal del nivel 4+, mentes que siguen nél Uviéu y Carreño per 14 díes más.

Asturies suma cuatro xornaes siguíes con menos de 200 contaxos. El vienres hebo 217 positivos detectaos, a los que siguieron 191, 138 y, nos dos díes últimos, 127 y 161 –los datos oficiales de la COVID-19 sumen ún más pa poner el total en 162–, cuando la media diaria la selmana pasada foi 226.

La tasa de positividá nestes dos xornaes asitióse nun 5,20 y un 5,87 por cientu. A 7 díes, esti llunes el porcentaxe quedaba nun 6,77 por cientu –l'actualización de les cifres rebáxala a ayeri a un 6,58 por cientu–, siguiendo una llinia descendente.

Estos dos díes finaron 13 persones, 7 muyeres y 6 homes, de los que nengún vivía en centru de mayores: 6 el vienres y 7 ayeri. Dende qu'entamó l'andanciu perdieron la vida cola enfermedá causada pol coronavirus SARS-CoV-2 1.681 ciudadanos –sumóse na serie una muerte más de díes anteriores non contabilizaes–.

Hai hospitalizaos 459 pacientes con confirmación o sospecha de COVID-19, a los qu'hai que sumar otros 130 que tán na UCI. Son 34 y 2 menos que'l domingu.

13 conceyos

La cifra de conceyos que siguen en riesgu estremu son 13 tres la salida de Cangas del Narcea, que mañana abre'l zarru perimetral. Uviéu y Carreño van siguir otros 14 díes tres confirmar Salú a los ayuntamientos la so segunda –a lo llargo de la tarde confirmóse que tamién Gozón– y primer prórroga del nivel d'alerta 4+, de manera respeutiva.

"Nel casu d'Uviéu valoróse que les incidencies acumulaes global y de persones mayores permanecen perriba de 325 y 195 casos por 100.000 habitantes, respeutivamente. En cuanto a Carreño, les incidencies a 14 díes siguen en valores altos, percima de 600 casos por 100.000 habitantes na tasa global, y superen los 500 en persones mayores", espliquen dende la conseyería.

Completen esta llista Gozón, Xixón, Mieres, Samartín del Rei Aurelio, Siero y Llaviana, amás d'Avilés, Corvera, Castrillón, Ḷḷena y Ayer, con midíes especiales al tener un nivel de tresmisión del coronavirus SARS-CoV-2 mui alta. Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

2 biltos en residencies

La conseyería detectó ente'l 9 y el 15 de febreru un total de 2 biltos en residencies de mayores, mesma cantidá que la selmana anterior. En total contabilizáronse 10 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como biltos cuando hai al menos trés. Nesi sen, nesti periodu confirmaróse casos n'otros 17 centros residenciales de los 270 esistentes nel país.

Na imaxe, Uviéu. Semeya obra d'Hernán Piñera baxo llicencia CC BY-SA 2.0.