La Fundación Princesa convoca'l Premiu al Pueblu Exemplar d'Asturies del 2021

El reglamentu espublízase, al igual que n'años anteriores, n'asturianu, gallego-asturiano y castellanu. Somao ganó la edición pasada.

Yá ye posible presentar candidatures pal XXXII Premiu al Pueblu Exemplar d'Asturies, correspondiente al 2021, con plazu hasta'l 15 de xunetu a les 14 hores. La Fundación Princesa de Asturias busca con esti gallardón reconocer al "pueblu, aldea, nucleu de población, espaciu paisaxísticu o grupu humanu del Principáu d'Asturies que rescamplara de mou notable na defensa y conservación del so entornu natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obras comunales o otres manifestaciones de solidaridá sobresalientes”.

Dende'l 2014 esta iniciativa espubliza el so reglamentu nes trés llingües que se falen nel país. Amás, nos años últimos vien respetando la toponimia tradicional, inclusive ensin ser oficial como foi'l casu d'Asiegu y Somao, lo dos últimos ganadores.

La entrega del premiu dase nel sábadu d'ochobre que sigue a los Premios Princesa, cola presencia de los reis d'España, la princesa y la infanta. Calcando equí pueden consultase les bases n'asturianu, y faciéndolo equí, en gallego-asturiano.

Na imaxe, ganadores del Premiu al Pueblu Exemplar d'Asturies hasta'l 2020. Gráficu propiedá de la Fundación Princesa de Asturias.