Salas y Valdés eviten la prórroga al salir del riesgu estremu

Esti xueves rexistráronse 249 casos nuevos de COVID-19 y hebo que llamentar 13 muertes.

La llista de conceyos en nivel d'alerta 4+ sigue rebaxándonse. Tres Llanes y Noreña, salen del riesgu estremu Salas y Valdés, cola particularidá de que son los primeros que nun necesiten prórroga del zarru perimetral y de les restricciones pa facelo.

Nel casu de Salas la vuelta a les midíes comunes pa toa Asturies a esceición de 15 conceyos va facese'l domingu, y nel de Valdés, el llunes, mentes qu'en Noreña ye mañana. Siguen n'alerta 4+ Grau, Uviéu, Cangas del Narcea, Gozón, Xixón, Mieres, Samartín del Rei Aurelio, Siero, Carreño y Llaviana, amás d'Avilés, Corvera, Castrillón, Ḷḷena y Ayer, con restricciones especiales al tener un nivel de tresmisión del coronavirus SARS-CoV-2 mui alta.

Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Sigue la tendencia descendente

A falta de la espublización de los datos oficiales de la COVID-19, la Conseyería de Salú comunicó 249 contaxos ayeri. Son 16 menos que'l miércoles, siguiendo la tendencia descendente de los díes últimos.

El Serviciu de Salú del Principáu d'Asturies (SESPA) fixo'l xueves 5.957 pruebes de diagnósticu d'infeición activa, polo que la tasa de positividad asitióse nel 6,55 por cientu, inferior tamién a la del día anterior, que quedó nun 7 por cientu. A 7 díes, esti porcentaxe'l miércoles yera del 7,96 por cientu.

Na xornada finaron 13 persones cola enfermedá causada pol coronavirus SARS-CoV-2: siete homes de 97, 90, 86, 85, 85, 82 y 72 años y seis muyeres 94, 93, 93, 87, 85 y 58, de los qu'ún vivía nun centru de mayores. Dende qu'entamó l'andanciu la cifra de finaos asciende a 1.646.

Hai nestos momentos 526 hospitalizaos con confirmación o sospecha de COVID-19, 47 menos que'l miércoles. Mentes, na UCI tán ingresaos 125 pacientes, mesma cantidá que nel día anterior.

Na imaxe, Salas. Semeya recortada propiedá del Conceyu de Salas.