Entama la vacunación a los mayores de 80 años

Esti miércoles rexistráronse 265 contaxos, con una tasa de positividá del 7 por cientu. Noreña sal de riesgu estremu esti vienres.

Los mayores de 80 años d'Asturies yá tan recibiendo la vacuna. Ayeri entamó'l procesu en centros de día tres completase la campaña en residentes en centros de mayores y cuidadores, y siguir col personal sanitariu.

El conseyeru Pablo Ignacio Fernández Muñiz confirmó que se van poner nesti coleutivu les de Pfizer y Moderna, mentes que les d'AstraZeneca, les últimes en llegar, van destinase pa menores de 55 años. Otra manera, refugó una desescalada rápida tres pasar el picu de la tercer fola pola peligrosidá que trai la cepa inglesa, que yá produz más del 50 por cientu de los contaxos.

11 finaos

A falta de la espublización de los datos oficiales de la COVID-19, la Conseyería de Salú informó de 265 contaxos ayeri –l'actualización resta 14 por duplicaos en xornaes previes, polo que'l total del andanciu pasa de 40.455 a 40.706 (+251)–. Son 15 menos de los anunciaos el martes, con una tasa de positividá más alta, del 7 por cientu por un 6,95.

Esti porcentaxe a 7 díes asitiábase nun 8,42 por cientu, con una tendencia de baxada –l'actualización déxalu nun 7,96 por cientu a día d'ayeri–. Sicasí, entovía ta lloñe del 5 por cientu que marca la Organización Mundial de la Salú (OMS) como llende pa tener controlada la pandemia.

Na xornada finaron 11 persones: ocho muyeres de 103, 90, 89, 88, 87, 83, 80 y 54 años y trés homes de 96, 85 y 84, de los qu'ún vivía en residencia. Dende qu'entamó l'andanciu algámense yá 1.633 muertos cola enfermedá causada pol coronavirus SARS-CoV-2.

Hai hospitalizaos 573 pacientes con confirmación o sospecha de COVID-19, a los qu'hai que sumar 125 que tán na UCI. Son 1 y 2 más que'l martes, de manera respeutiva.

17 conceyos en nivel 4+

La Conseyería de Salú, tres decidir el llevantamientu dende güei del zarru perimetral y de les midíes del nivel 4+ a Llanes por salir del riesgu estremu, fai lo propio con Noreña. L'ameyoría de la situación nel conceyu permite dar esti pasu a la metá de la primer prórroga y rebaxar dende'l sábadu a 17 los territorios coles restricciones más dures.

Son Grau, Uviéu, Cangas del Narcea, Gozón, Xixón, Mieres, Samartín del Rei Aurelio, Salas, Valdés, Siero, Carreño y Llaviana, amás d'Avilés, Corvera, Castrillón, Ḷḷena y Ayer, con midíes especiales al tener una situación epidemiolóxica peor. Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

2 biltos en residencies

La conseyería detectó ente'l 2 y el 8 de febreru un total de 2 biltos en residencies de mayores, 4 menos que la selmana anterior. En total contabilizáronse 21 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como biltos cuando hai al menos trés. Nesi sen, nesti periodu confirmaróse casos n'otros 14 centros residenciales de los 270 esistentes nel país.

65 brotos activos

Asturies informó al Ministeriu de Sanidá de la esistencia de 65 biltos activos, 1 menos qu'hai una selmana, con un total de 885 casos. 21 d'ellos detectáronse estos 7 díes últimos, comunica la conseyería.

Na semeya, Fernández Muñiz ayeri na sesión telemática estraordinaria del Plenu del Conseyu Interterritorial del Sistema Nacional de Salud sobre la evolución de la pandemia.