Llanes conviértese nel primer conceyu en salir del riesgu estremu

El xueves va finar el zarru perimetral en Llanes y van tornar les midíes de restricción vixentes nel conxuntu d’Asturies cola esceición de los 18 conceyos que tán en nivel d’alerta 4+. Sal del riesgu estremu na revisión de la primer prórroga al ameyorar los indicadores y nun contar con positivos dende’l miércoles pasáu.

La Conseyería de Salú treslladó al alcalde Enrique Riestra esta decisión na xunta telemática celebrada esta mañana. Ésta taba prevista ayeri martes, pero les autoridaes sanitaries prefirieron esperar una xornada más pa evaluar la tendencia de los datos.

Éstos, según espliquen dende’l Conceyu, “indiquen un ameyoramientu con una reducción nos trés parámetros de referencia: la tasa por cada 100.000 habitantes, la tasa de mayores de 65 años y la trazabilidá”. Los datos últimos espublizaos pola conseyería, correspondientes al llunes, afiténlos en 324, 171 y 61,29 por cientu, de manera respeutiva.

“Somos el primer ayuntamientu asturianu en da-y la vuelta a esta esmoleciente evolución epidemiolóxica y el méritu ye de los vecinos, que supieron responder con responsabilidá. Pasamos del ‘riesgu estremu’ al ‘riesgu’, y tenemos que siguir nesta llinia y nun confianos nin baxar la guardia. El virus sigue activu y al acechu”, alvirtió Riestra.

Dende esta medianueche los ciudadanos –sigue vixente’l toque de queda de 22 a 6 hores–, a esceición de los residentes nos 18 conceyos con restricciones, van poder salir y entrar nel conceyu. Amás, la hostelería de Llanes va poder abrir interiores y permítense los aconceyamientos en domicilios.