“Asturies tien el propósitu de caltener el zarru perimetral de la comunidá lo que dure l’estáu d’alarma”, asegura Barbón

“Si queremos descender a niveles oxetivos de seguridá pública dende’l puntu de vista sanitariu, necistamos sacrificar la Selmana Santa”, apuntó’l presidente Adrián Barbón que, de nun facelo asina, augura “una cuarta fola brutal”. La determinación del Gobiernu ye “caltener el zarru perimetral de la comunidá lo que dure l’estáu d’alarma”, esto ye, ensin movilidá hasta mayu.

“Hai que pinchar el globu, que dalgunos hincharon yá, de que vamos vivir la Selmana Santa como vivimos la Navidá”, afirmó con contundencia’l socialista nuna intervención tres el Conseyu de Gobiernu pa informar de la situación actual de la pandemia de COVID-19. Na mesma apuntó que’l 6,1 por cientu de la población asturiana contaxóse del coronavirus SARS-CoV-2 y pronosticó, pocos díes de conocer qu’un 25 por cientu de los casos nel país yeren de la cepa inglesa, que “güei podíamos tar falando d’una cifra cercana al 40 por cientu”.

Esta variente, muncho más contaxosa, esmolez muncho a les autoridaes sanitaries, enfotaes na campaña de vacunación. Los siguientes en recibir la primer dosis van ser los grandes dependientes non institucionalizaos, pa depués pasar a los mayores de 80 años

Mes de febreru “que pue ser dramáticu”

Barbón defendió les midíes activaes de manera indivualizada por conceyos pa controlar l’espardimientu del coronavirus y presentó como exemplos, con gráficos, los amayoramientos na incidencia de Grau, Llanes y Noreña. “Quédanos un mes de febreru que pue ser dramáticu. Tenemos qu’evitar el colapsu sanitariu; ési ye’l retu.

Otra manera, el presidente anunció la selmana próxima la celebración de dos conseyos de Gobiernu pa tratar el tema del fondu d’ayudes a los sectores perxudicaos pola pandemia.

Na imaxe, Barbón muestra'l gráficu cola evolución de la incidencia a 14 díes de Grau cola toponimia billingüe. Semeya obra d'Armando Álvarez.