RTPA entama a emitir los siete programes escoyíos na convocatoria d’ayudes pa la producción n’asturianu

‘Al son’, esta nueche, va ser el primeru de los siete programes escoyíos na convocatoria ‘Asturies crea cultura / Asturies crea sinerxes’ entamada pola Conseyería de Cultura, Política Llingüística y Turismu y RTPA que se va emitir. Son cinco espacios de televisión y dos de radio pa promocionar l’asturianu y el gallego-asturiano.

El proyeutu de Goxe Producciones centráu na música del país baxo la conducción de Xune Elipe va estrenase a les 23.30 hores en RPA. El xueves el turnu va ser pa ‘La ciencia del cuentu’, una serie de radioteatru de 15 capítulos que recurre a la ficción y a l’actualidá p’averar al oyente al mundu de la ciencia.

Esti programa, yá grabáu, contó cola participación d’actores y actrices profesionales d’Asturies. Pa conocer cómo se fixo esti espaciu presentáu por Graciela Olivares y Pablo de María mañana va emitise un especial en TPA a les 23.15 hores.

El tramu nocherniegu que va de les 23.30 a les 00.30 hores va completase con otra propuesta col asturianu como llingua vehicular. Trátase de ‘Sentir Asturies’, conducíu por Arantxa Margolles y Inaciu Galán, que tolos martes y miércoles van tratar xunto col so equipu l’actualidá asturiana, la ciencia, la cultura y l’ociu.

Esti espaciu últimu, que nun tien rellación cola convocatoria de la conseyería y RTPA, forma parte de la reestructuración estrenada güei que la RPA fai de la so programación, con renovación de la so identidá sonora con cabeceres, indicativos y sintoníes nueves de los principales programas de la cadena. Esta apuesta pola cultura del país complétase con un cambiu na política musical de la canal, cola previsión d’emitir namái cantares de músicos y bandes asturianes.

‘Tierra de quesu’, el 24 en TPA

No que respeuta a TPA, les cinco producciones escoyíes son ‘Tierra de quesu’, la obra de teatru ‘Hansel y Gretel’ de Nun Tris, ‘50 semeyes del Patrimoniu Industrial’, el programa infantil ‘Animalada Xabaz’ y el documental ‘Patria querida’ que se va emitir el 8 de setiembre, Día de la Nación Asturiana. El primeru n’estrenase va ser el día 24 la serie documental dedicada al quesu que conducen Lluis Nel Estrada y Pablo Casanueva –que va ocupar la franxa de ‘L’horru’, qu’esti miércoles presenta’l tercer de los sos cinco capítulos– mentes que los restantes nun tienen fecha entovía.

Política Llingüística destinó 130.788 euros a ‘Asturies crea cultura / Asturies crea sinerxes’ col oxetivu de fomentar nun contestu de pandemia la creación d’obres audiovisuales de temática llibre pa poner en valor la cultura asturiana al tiempu d’impulsar el sector audiovisual como parte de la industria cultural asturiana y facilitar d’esta manera la creación de sinerxes ente productores y creadores. “La ufierta seleicionada foi mui difícil d’establecer, pol nivel de los proyeutos presentaos y pola so variedá. El fechu de facela con temática llibre fixo qu’hubiere una respuesta mui variada”, apuntó Berta Piñán, que tamién rescampló que “nun son sobre l’asturianu, lo que ye importante, porque inciden na normalización del asturianu como llingua vehicular en cualquier contestu”.

La conseyera, que dixo tar “mui satisfecha”, apuntó ente “les sorpreses mui gratificantes” de la convoctoria “que se presentaren productores que nunca lo fixeren col asturianu, lo que quier dicir que la producción audiovisual d’Asturies nun tien mieu al asturianu nin al gallego-asturianu, y que lo tomaron con absoluta normalidá”.

Na imaxe, un momentu de la grabación del programa de radioteatru 'La ciencia del cuentu', que se va emitir los xueves en RPA, con un especial mañana de 'cómo se fixo' en TPA.