La FSA-PSOE celebra’l so 120 aniversariu

El 27 de xineru del 1901 tenía llugar nel Centru Obreru d’Uviéu el congresu fundacional de la Federación Socialista Asturiana (FSA-PSOE), efeméride de la qu’esti miércoles se cumplen 120 años. El partíu que gobierna Asturies anguaño tuvo un papel importante nos acontecimientos históricos vivíos nel país nesti tiempu.

Nel 1891 constituyíase en Xixón, en L’Atalaya, la primer agrupación socialista, doce años depués de la creación del Partido Socialista Obrero Español (PSOE) en Madrid por Pablo Iglesias. Llueu vinieron Uviéu, Mieres, Sama, Turón, Trubia…, hasta la fundación de la FSA, con Manuel Vigil como primer cabezaleru, entráu ya’l sieglu XX.

Nes eleiciones de payares del 1901 yá resultaben escoyíos socialistes en dellos conceyos del país: el propiu Vigil y Ángel Suárez Fierro, n'Uviéu, y Aureliano Suárez y Francisco Palau, en Mieres, a los qu'hai que sumar otros dos en Castrillón. Dos años depués, esta cifra aumentaría a 9.

Tamién nel 1902 Xixón acoyía’l VI Congreso Nacional del PSOE, cola presencia d’Iglesias. Estos primeros años foron d’afitamientu del socialismu n’Asturies, a lo que contribuyó sobre manera la fundación del Sindicato de los Mineros Obreros de Asturias (SOMA) nel 1910 por Manuel Llaneza, col que compartía espaciu nes Cases del Pueblu.

Nel 1918 Andrés Saborit convertíase, por Uviéu, nel primer diputáu socialista en Cortes. Tres un tiempu díficil nos años previos a la dictadura de Primo de Rivera, la FSA sería protagonista cola llegada de la República.

El so líder Belarmino Tomás foi una figura clave na allianza de socialistes, comunistes y anarquistes qu’entamó la Revolución d’Ochobre del 34 y presidiría’l Conseyu Soberanu d’Asturies y Lleón nel 1937 en plena ofensiva de les tropes ‘nacionales’ de Franco, a lo que siguiríen años d’exiliu y clandestinidá.

Transición y autonomía

Tres la muerte del dictador y la llegalización de los partíos políticos, el socialismu n’Asturies tornó a posicionase. El fíu de Tomás, Rafael Luis Fernández Álvarez, presidiría tres el so regresu de México’l Conseyu Rexonal d’Asturies, l’órganu preautonómicu creáu nel 1978, hasta les eleiciones del 1983, cuando la FSA ganaba les eleiciones con Pedro de Silva como candidatu.

Dende esi momentu’l Gobiernu asturianu tendría color encarnáu a esceición de dos etapes, la de Sergio Marqués del PP (1995-1999) y la de Francisco Álvarez-Cascos de Foro (2011-2012). Juan Luis Rodríguez-Vigil (1991-1993), Antonio Trevín (1993-1995), Vicente Álvarez Areces (1999-2011) y Javier Fernández (2011-2019) seríen los dirixentes socialistes qu’ocuparíen la presidencia hasta la llegada del actual secretariu xeneral, Adrián Barbón.

Amás del nomamientu de llavianés, un reconocíu almirador de De Silva, n’ochobre del 2017, nel 32 Congresu del partíu, llegaría tamién un xiru de 180 graos na postura histórica amosada pola FSA con respeuto a les llingües d’Asturies. La militancia aprobaba sofitar la oficialidá y la organización incorporábala al programa eleutoral pa les eleiciones del 2019.

Actu públicu d'aniversariu con Barbón y Sánchez

A les 19 hores va principiar un actu públicu d'aniversariu en llinia nes sos canales de YouTube y Facebook. Nel mesmu van intervenir Barbón; la secretaria d'Organización, Gimena Llamedo; el secretariu xeneral del PSOE y presidente del Gobiernu estatal, Pedro Sánchez; y la vicesecretaria xeneral del PSOE, Adriana Lastra.

Na semeya, Barbón firma los sos primeros decretos como presidente de manera simbólica nel escritoriu de Tomás nel tiempu del Conseyu Soberanu d'Asturies y Lleón.