Ráspiense los 600 contaxos na peor xornada de la tercer fola

La tasa de positividá asitióse nun 10,91 por cientu. Entraron a valir esti miércoles les restricciones n'Ayer, de les que se llibra de momentu Valdés al ameyorar los sos datos.

A falta de la espublización de les cifres oficiales de la COVID-19, la Conseyería de Salú informó de 591 casos nuevos ayeri. Son 165 más que'l martes y la cantidá más alta de la tercer fola, superando los 511 del vienres (númberu que'l recuentu posterior aumentó hasta los 523).

Fixéronse 6.382 pruebes de diagnósticu d'infeición activa, polo que la tasa de positividá foi del 10,91 por cientu, superior a la del día anterior, cuando s'asitió nel 9,11 por cientu. A 7 díes ye del 10,21 por cientu, doblando la llende del 5 por ciertu que marca la Organización Mundial de la Salú (OMS) pa tener controlada la pandemia.

Na xornada finaron 4 persones cola enfermedá causada pol pol coronavirus SARS-CoV-2: dos muyeres de 88 y 82 años y dos homes de 85 y 74, de los que dos teníen el so domicilio en residencia. Dende qu'entamó l'andanciu'l númberu de muertes llega yá a 1.481.

Hai hospitalizaos 476 pacientes con confirmación o sospecha de COVID-19, a los qu'hai que sumar 81 que tán na UCI. Son 24 y 7 más que'l llunes, de manera respeutiva.

11 biltos en residencies

La conseyería detectó ente'l 19 y el 25 de xineru un total de 11 biltos en residencies de mayores, 5 más que la selmana anterior. En total contabilizáronse 196 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como biltos cuando hai al menos trés. Nesi sen, nesti periodu confirmaróse casos n'otros 22 centros residenciales.

Carreño podría ser el próximu

Les restricciones a los conceyos en nivel d'alerta 4+, qu'inclúin el zarru perimetral, entraron a valir güei n'Ayer, con Carreño na rampla de salida nel casu de nun ameyorar los sos datos como fixo Valdés, de momentu fuera d'avisu. Les midíes tán anguaño vixentes en Grau, Avilés, Castrillón, Corvera, Uviéu, Llanes, Cangas del Narcea, Gozón, Noreña, Xixón, Mieres, Samartín del Rei Aurelio y Ḷḷena.

Pa consultar la situación de tolos territorios y les restricciones actives en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na imaxe, Morea, población con más habitantes d'Ayer. Semeya obra de Carmen Morán con llicencia CC BY 4.0.