RPA incorpora a la so programación ‘Al son’, espaciu centráu na música d’espresión asturiana

Los movimientos y tendencies de la música asturiana dende’l 1974, fecha considerada de nacimientu del asturianismu modernu, hasta anguaño van protagonizar los conteníos de ‘Al son’. Esti espaciu selmanal n'asturianu “que quier ser una especie d’enciclopedia sonora” va conducilu Xune Elipe en RPA tolos llunes.

El cantante de Dixebra y responsable de Goxe Producciones va tar acompañáu pola llocutora Lena Elipe y el periodista especializáu en música Xicu Ariza, ex redautor d’Asturies.com. Ente los trés van tratar fondamente “toles propuestes sonores que se dieron nel panorama musical del país nes últimes cuatro décades: Nuevu Canciu Astur, folk (música celta), folk-rock, rock n’asturianu, post-folk, etc”.

Asina, van emitise especiales de los pioneros de la música asturiana, l’asturianada contemporánea, les músiques urbanes, el jazz de raigañu, les muyeres con voz propia, la canción d’autor depués del Nuevu Canciu, el pop llariegu, les rareces de la música asturiana, los sones pa la reciella, el celtismu na música asturiana, la revolución de la pandereta, la música del Navia-Eo, les bandes de gaites, la emigración na música asturiana, el folk de cámara o les nueves tendencies, ente otros munchos temes. “‘Al son’ quier ser una especie d’enciclopedia sonora de la música d’espresión asturiana contemporánea, onde se contestualice’l so nacimientu y posterior desarrollu”, espliquen dende Goxe.

Cincuenta capítulos confirmaos

Pel programa amás van pasar dellos de los protagonistes actuales de la escena propia, que van falar del so trabayu, presentando les sos últimes obres. L’espaciu, d’una hora de llargor, va incluyir tamién les seiciones ‘Sonoteca’, una hemeroteca sonora onde se recueyen datos, socedíos o fechos relevantes o llamativos de la historia de la música asturiana; ‘Versiones’, adaptaciones de temes asturianos o viceversa; y ‘Nomes de la Música Asturiana’, una ficha sonora sobre les principales figures y bandes de la nuesa escena.

La estrena de ‘Al son’ va tener llugar esti llunes. Los programes, cincuenta confirmaos nesta primer tanda, van emitise a les 23.30 hores en RPA, con redifusión les fines de selmana, ocupando asina’l vacíu esistente nos años últimos na radio pública asturiana no que se refier a la música del país, asina como la falta de conteníos en llingua asturiana.