Finó l'articulista y escritor Luis Arias Argüelles-Meres

Nes sos llinies siempre amosó respetu y compromisu pa cola llingua y el patrimoniu d'Asturies, siendo una persona mui querida nos ámbitos culturales del país.

Asturies alboreció esta mañana con una noticia murnia. Dexábanos a la temprana edá de 63 años Luis Arias Argüelles-Meres.

Profesor de Lengua Española y Literatura nel IES César Rodríguez de Grau, nació nel añu 1957 en Llaniu, onde residía, y yera una persona bien conocida polos sos artículos d'opinión en prensa, escribiendo na so trayeutoriua tanto en 'La Nueva España' como, nos años últimos, en 'El Comercio', amás de tener collaborao na desapaecía 'Atlántica XXII', ente otros medios. Tamién foi autor de dellos llibros y reconocíu con premios como'l de la Crítica de l'Asociación d'Escritores d'Asturies nel 2014 na estaya de columna periodística.

Bien conocedor de la llingua asturiana y fíu del escritor Manuel Antonio Arias 'Antón de la Braña', foi un firme defensor del nuesu patrimoniu nes páxines de prensa y tamién nel so día a día. Instituciones como l'Academia de la Llingua Asturiana y coleutivos como la Xunta pola Defensa de la Llingua Asturiana y Iniciativa pol Asturianu coincidieron na importante perda que supón pa la nuesa cultura la so muerte.

L'Academia de la Llingua Asturiana llamenta fondamente la perda de Luis Arias Argüelles-Meres, un gran intelectual y un gran asturianu. Enxamás s’escaecerá’l so compromisu con esta tierra y cola llingua y la cultura del nuesu pueblu.

— Academia Llingua Ast (@ALLA_ast) January 20, 2021

L'equipu que conforma Asturies.com quier aprovechar estes llinies pa treslladar el nuesu más sentíu pésame a la familia, collacios y compañeros d'Arias Argüelles-Meres.

Na semeya, Arias Argüelles-Meres na mesa redonda ‘El papel de los medios na oficialidá: el camín andáu’ del II Seminariu ‘Oficialidá, el camín constitucional pal futuru del asturianu’ entamáu por Iniciativa pol Asturianu nel 2019.