Reclamen la presencia del asturianu nes señales nueves d'Uviéu

Iniciativa pol Asturianu pide al PP y Ciudadanos que cumplan cola Llei d'Usu.

Tres conocer la salida a concursu d'un contratu por 1,4 millones de renovación de señales n'Uviéu, esti coleutivu reclama al Conceyu que la llingua asturiana tenga presencia nos rótulos nuevos. "La presencia del asturianu nesta cartelería nun va xenerar nengún costu adicional al contratu. La capital d’Asturies nun puede quedar nun cercu nel que nun se faiga un usu normal del idioma y de la toponimia oficial", apunta.

Coles mesmes, afala al equipu de gobiernu municipal a dar un pasu pa que l'idioma "vaya ganando presencia nos espacios públicos y na cartelería d’Uviéu como se facía col gallegu en Vigo o Santiago cuando gobernaba’l PP", tamién na programación del Xacobéu. Recordó nesti puntu'l cumplimientu de la Llei d'Usu y Promoción del Bable/Asturianu que dicen defender tanto los populares como Ciudadanos, como bien recordó estos díes el diputáu y secretariu d'Organización naranxa Sergio García nun polémicu tweet nel que venceya la oficialidá con obligatoriedá y nacionalismu: "Si dende Ciudadanos s’amparen na Llei d’Usu creemos que ye un momentu ideal pa facer realidá esa defensa d’esta Llei" que, recuerda Iniciativa pol Asturianu, "hai que cumplila, desarrollala y dar exemplu".

✅ Como perfectamente sabes, la defensa del asturiano ya se realiza con la Ley de Uso y fomento. Con la que estamos totalmente de acuerdo desde @Cs_Asturias .
❌Otro tema, muy muy diferente, es tratar de obligar a través de la oficialidad, a aprenderlo a la población

— Sergio García (@SergioGarciaCs) January 17, 2021

Semeya obra de Javier Losa baxo llicencia CC BY 2.0.