‘Gaita hero’, el tema de Tever que tamién ye un videoxuegu

Depués de 'Fayendo' y 'Saltonggaeton', Tever torna a soprender cola tercer pieza del EP ‘Fechu’n PLA’. Ye ‘Gaita hero’, un cantar que, amás d’una historia visual, como los dos anteriores, cuenta con una versión de videoxuegu arcade pa PC y dispositivos móviles.

“El mundu necesita un héroe nuevu pa ser salváu y equí ye onde te toca cumplir cola misión. Conviértete nel Gaita Hero que toos necesiten”, entama’l retu que presenta Tever. El rival, “un bichín”, la COVID-19, que lo “enllenó too: parques, escueles, cases, teatros, restaurantes, Congresu de los Diput…. (esto último non)”.

Poro, la misión del xuegu de plataformes va ser “finar con toos aquellos que veas nel to camín y lliberar al mundu d’esti bichín pesáu y molestu”. Asina, mientres suena’l cantar de fondu, y en dellos escenarios como paisaxes asturianos o una mina de carbón, el gaiteru deberá superar obstáculos y matar coronavirus hasta completar l’oxetivu final nel HUCA.

‘Gaita hero’ ye la tercer propuesta del proyeutu del gaiteru Pablo Manuel Díaz García, nome real de Tever, nel que amiesta música tradicional y nueves teunoloxíes, y que va contar con seis histories visuales. Nesta ocasión, el gaiteru esperimenta con los soníos tan carauterísticos de los videoxuegos de la década de los 80 y primeros años de los 90.