Llaceria Rock asoleya un videu del conciertu pol so venti aniversariu

Tuvo llugar n'avientu del 2019 en Lluanco.

Paez que queden mui atrás los conciertos en sales o bares enllenos de públicu, cites que se dexaron d'entamar nel mes de marzu por cuenta de la situación sanitaria pola pandemia de COVID-19 y que los aficionaos a la música echen en falta. Sicasí, hai poco más de doce meses, les Navidaes pasaes, Asturies celebraba les fiestes con dellos conciertos, ente los que rescampló la vuelta de Llaceria Rock pa celebrar los venti años de la so primer actuación nes fiestes de Santana nel barriu altu de Lluanco.

Pa recordar esa cita y tratar de facer más llevadera la espera a la vuelta a los chigres musicales, la banda formada por Míguel Fernandi ‘Burilo’ (cantante), Rafa Ávila (guitarra), Pablo Rodríguez (baxu) y Wes Rodríguez (batería) ta acabante d'asoleyar un videu col cantar col que despidió aquella actuación nel Livingston Café-Teatro, 'Güel a macarrón'. Trátase d'una versión en chancia del 'When I come around' de Green Day con lletra n'asturianu de Kiroma.