9.707 persones recibieron la vacuna de la COVID-19 nos ocho primeros díes

Un 80,7 por cientu de les 12.020 vacunes que recibió Asturies pa residentes y trabayadores de centros de mayores yá s’alministró, apuntó Rafael Cofiño, direutor xeneral de la Salú Pública. La conseyería llama a los mozos de 15 a 25 años de Xixón, Carreño, Gozón, Avilés, Castrillón y Corvera a llendar la so actividá social.

Cofiño intervino esta mañana pa dar a conocer la situación epidemiolóxica actual, “con una tendencia ascendente –dende’l 26 d’avientu– que s’observa na incidencia a 7 díes global, anque non entovía na incidencia a 7 díes en persones mayores de 65 años”. Los datos últimos aportaos pol Observatoriu de Salú n’Asturies, correspondientes al sábadu reflexaben 64,72 casos por cada 100.000 habitantes y 37,6, de manera respeutiva.

Según los datos del Ministeriu de Sanidá, Asturies ta en riesgu mediu n’indicadores de tresmisión del coronavirus SARS-CoV-2 y nos d’actividá asistencia, altu. “Por poner en comparación, los d’ocupación hospitalaria n’UCI tán agora mesmo na situación na que tábemos el 25 d’ochobre, y los d’ocupación de plantes hospitalaries, como’l 14 d’ochobre”, esplicó’l direutor xeneral de Salú.

Xeográficamente, el mayor incrementu d’incidencia ta centráu nel área sanitaria III, con cabecera n’Avilés, sobre manera en Castrillón y Corvera. Son estos conceyos, xunto col propiu Avilés, Carreño, Gozón y Xixón nos que la Conseyería de Salú fai un llamamientu a les moces y mozos de 15 a 25 años pa que “llenden de manera mui estricta los contautos y salíes de los sos domicilios nos díes próximos pa frenar la tresmisión del virus, amás de facer una vixilancia activa del so estáu de salú y de les persones coles que convivan, sobre manera si son mayores o con enfermedaes cróniques”.

11.700 más llegaes güei

Tamién rescampló Cofiño’l bon ritmu de la campaña de vacunación, con un 80,7 por cientu del total de dosis recibíes alministrada y un 8 por cientu de refugu a vacunase. En total, 9.707 residentes y trabayadores de mayores yá la recibieron magar les fiestes navidiegues, con otres 11.700 yá preparaes pa siguir suministrándola estos díes.

Sobre los biltos esistentes, María José Villanueva, coordinadora de Programes COVID de la conseyería, cifró en 141 persones les que tán en cuarentena pol atopáu na primer plantía del Sporting. El total de positivos confrimaos son 37.

Hai brotos tamién na zona d’Avilés, ente ellos ún ente l’alumnáu de Segundu de Bachilleratu del colexu Paula Frassinetti que podría tener venceyos tamién col del Sporting, con orixe el rellaciones sociales “en domicilios o llugares d’hostelería” qu’esmolecen y que tán siendo oxetu d’estudiu por parte de la conseyería. Otra manera, tamién ta baxo’l focu los contaxos nuna familia cola cepa inglesa del coronavirus SARS-CoV-2, más contaxosa.