Asiegu, Arenas, San Roque, Po y Santolaya yá son los únicos topónimos oficiales

Cola espublización nel BOPA del decretu toponímicu de Cabrales, los nomes de llugar tradicionales d’esti conceyu yá son los únicos oficiales, derogando los castellanizaos. Asina, Asiegu, Arenas, San Roque, Po y Santolaya son les formes válides, sustituyendo a ‘Asiego’, ‘Las Arenas’, ‘Prado’, ‘Poo’ y ‘Puertas’, de manera respeutiva.

Cabrales ye’l conceyu númberu 67 en dar esti pasu, quedando namái 11 por completar el procesu. Los pendientes son Llanera, Castropol, Somiedu, Cuideiru, Ayande, Caravia, Ibias, El Valle Baḥu de Peñamellera, Salas, Navia y Pravia, en fases diferentes del mesmu.

La intención de la Conseyería de Cultura, Política Llingüística y Turismu ye que nel 2022 los 78 conceyos del país tengan iguada la so toponimia pa pasar llueu a recuperar los nomes tradicionales de los principales accidentes xeográficos (ríos, montes, playes, cabos, golfos, llagos, etc.), pa lo que va ser necesario un decretu regulatoriu nuevu. Hasta la de Cabrales, llevábase un añu y mediu ensin avances nesi sen, yá qu’Eilao, en xunetu del 2019, foi l’últimu en facelo.

El procesu

Dende güei, los nomes tradicionales de Cabrales son los únicos oficiales, yá que’l decretu entra a valir cuando s’espubliza nel Boletín Oficial del Principáu d’Asturies (BOPA). Enantes pasara per un procesu qu’entama col trabayu de campu de la Xunta de Toponimia, el preste del Plenu del Conceyu del llistáu ellaboráu por ésta –al que pue presentar alegaciones, tamién los ciudadanos al pasar por un periodu d’esposición pública– y, pa finar, l’aprobación del Conseyu de Gobiernu.

Asina, les parrroquies d’Arenas, Po, San Roque y Santolaya recuperen los sos nomes, al igual qu’otres poblaciones como Asiegu, Ḥortigueru, L’Escobal o Pandiellu, y queden rexistraos topónimos menores como L’Atayu, La Ḥuente, La Pontiga o El Vau que nun lo taben hasta’l momentu. Ye de destacar el casu d’Asiegu, Premiu al Pueblu Exemplar del 2019 que concede la Fundación Princesa de Asturias, qu’emplegó esti topónimu de manera normal magar que l’oficial naquel entós yera ‘Asiego’, lo que revela’l fuerte raigón que tien esta forma, l’asturiana, ente los vecinos.

Na semeya, Asiegu.