Podemos presenta una enmienda pa destinar los 100.000 euros pa RTPA pal doblaxe de películes y series

Los Presupuestos del 2021 van contar esti miércoles col votu a favor de Podemos tres el dictame del Conseyu Ciudadanu de sofitar les cuentes magar que nun haya alcuerdu cola FSA. Sicasí, la formación morada caltién les 72 enmiendes parciales presentaes a los mesmos, ente les que rescampla una pa destinar los 100.000 euros pa RTPA pal doblaxe de películes y series al asturianu.

La decisión del Conseyu Ciudadano, “tomada por una mui amplia mayoría, del 85 por cientu”, vien tres valorar “l’absoluta esceicionalidá na que ta nesti momentu la sociedá asturiana, con una crisis sanitaria, económica y social a la que deben responder los poderes públicos movilizando tolos recursos disponibles. Creemos que’l Presupuestu, nesi sen, supón un escudu social pa les asturianes y asturianos que lleva tamién el sellu de Podemos Asturies porque respuende a los plantegamientos qu’esta institución lleva defendiendo dende que llegó a les instituciones de refuerzu de los servicios públicos esenciales y d’apuesta poles polítiques sociales”, valora’l voceru Enrique López Hernández, que criticó la posición de la Federación Socialista Asturiana (FSA) nes negociaciones al forzar a que se desendolcaren a última hora, no que nomó “el métodu Villa”, y por abriles a la derecha.

El sofitu a les cuentes nun quita a se caltengan les 72 enmiendes presentaes pal so alderique y votación nel Plenu de mañana, onde se va aprobar el dictame de Presupuestos colos apoyos de Asturies pela Izquierda (IX-IAS), el diputáu de Foro Adrián Pumares y Ciudadanos. Ente les propuestes de la formación morada rescampla una modifación pa destinar los 100.000 euros pa la RTPA pa “realizar la traducción y el doblaxe de programes, películas y otros conteníos a llingua asturiana”.

Otra pide emplegar 50.000 d’esos 100.000 euros pa recuperar l’Axenda Didáutica de cara al primer trimeste del cursu próximu, al entender que “la RTPA tien la obligación de normalizar la llingua asturiana ensin presupuestu extra”. Tamién presenta un cambiu pa que los 43.200 euros previstos por Política Llingüística pa ‘Servicios de calter informáticu’ vayan a “aumentar la partida destinada a los servicios de normalización lingüística de la Universidá d’Uviéu hasta algamar los 57.600 euros, de tal forma que polo menos dos persones a xornada completa puedan dedicase a esti fin”.

Na imaxe, Francisco Suárez y López Hernández, voceros del Conseyu Ciudadanu. Semeya obra d'Iván G. Fernández.