Un cuartu premiu dexa 3 millones d’euros en Villaviciosa

El sortéu de la Llotería de Navidá d’esti añu foi más xenerosu con Asturies que los pasaos, anque El Gordu nun se dexó cayer. Un cuartu premiu, el 75.981, reparte 3 millones d’euros en Villaviciosa, mentes que nel país tamién se celebren cuatro quintos premios en delles poblaciones, siendo especialmente afortunada Xixón.

L’Alministración de Llotería Númberu 1 de la capital maliaya vendió l’apreciáu 75.981, que ta mui repartíu al distribuyise tamién por participaciones de 5 euros na Floristería El Campo. Por cada décimu, esto ye 20 euros xugaos, danse 20.000 euros.

Tamién cayeron cuatro quintos premios: el 86.986, en Xixón, Uviéu y El Berrón; el 37.023, en Xixón; el 28.674, en Xixón; y el 43.831, en Xixón, Avilés, Balmonte, Cabanaquinta, Cualloto, El Franco y Posada (Llanera). Son 6.000 euros por cada décimu apostáu

El premiu grande, mui repartíu

El Gordu de la Llotería de Navidá d’esti 2020 foi’l 72.897, que tuvo mui repartíu per tol Estáu. Vendióse en Boñar, Punta Umbría, Reus, Granada, Madrid, O Grove, Bilbao, Granadilla de Abona, Xàbia, Cáceres, El Puerto de Santamaría, Córdoba, Haría, San Pedro del Pinatar, O Porriño, Vigo, Salamanca, Bonavista, Oliva, Alfara del Patriarca y Zamora.