‘El ramín de Nadal’, villancicu nuevu interpretáu pola maestra Noelia Veira

“Fai un ramín, güelín, / failu con seis llacinos, / pa güelina y pa ti / y pa tolos neñinos”. Asina entama ‘El ramín de Nadal’, villancicu nuevu al rodiu d’esta tradición asturiana de Navidá compuestu por Noelia Suárez Veira y Víctor Raúl Pintado ‘Vitu’, estrenáu a la guitarra pola maestra frente a L’Anguleru y Lolina la Rulera nel llar del pescador.

Foron precisamente estos dos personaxes navidiegos los qu’encargaron esti villancicu a los profesores del CP Marcelo Gago, d’Avilés. L’Anguleru yá ye bien conocíu por toles neñes y neños d’Asturies, qu’esperen la so llegada en Nuechebona: trátase d’un pescador que viaxa dende’l mar de los Sargazos toles Navidaes pa entrar per L’Arena y pescar angula, que vende pa mercar regalos que reparte peles cases esa mesma madrugada.

Lolina, mentes, encárgase de preparalo too los díes previos en tierra firme xunto a los Llendadores de Ríu pa que salga bien la nueche de Navidá. Un gran sofitu pa L’Anguleru.

‘El ramín de Nadal’ ye un villancicu perguapu que fala d’esta tradición asturiana que ta volviendo poco a poco a les cases. Tamién son munchos los colexos que fixeron y engalanaron en clase ramos de nadal, una cadarma de madera de forma triangular con 12 veles, una per cada mes del añu, de la que se cuelguen ufriendes.