Salú informa de menos d'un centenar de contaxos, con una tasa de positividá del 3,64

Finaron 10 persones con COVID-19 el miércoles, de los que 4 vivíen en residencies.

A falta de conocer los datos oficiales de la COVID-19, que nun se comuniquen dende'l vienres, la Conseyería de Salú informó de la detección ayeri de 91 casos nuevos de COVID-19. Son 26 contaxos menos que'l martes.

Na xornada fixéronse 3.322 pruebes de diagnósticu d'infeición activa, polo que la tasa de positividá asitióse nel 3,64 por cientu. Tamién baxa con respeuto al día anterior, cuando se rexistró un 3,93 por cientu.

Nes 24 hores últimes hebo que llamentar 10 muertes: siete muyeres de 93, 92, 91, 89, 89, 85 y 83 años y trés homes de 88, 77 y 73, de los que cuatro residíen nun centru de mayores. Dende qu'entamó l'andanciu 1.268 persones morrieron cola enfermedá causada pol coronavirus SARS-CoV-2.

Un total de 409 persones tán hospitalizaes con confirmación o sospecha de COVID-19, a los qu'hai que sumar 83 que tán na UCI. Son 35 y 9 menos que'l martes.

7 biltos en residencies

La conseyería detectó ente'l 8 y el 14 d'avientu un total de 7 biltos en residencies de mayores, 11 menos que la selmana anterior. En total contabilizáronse 85 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como brotos cuando hai al menos trés. Nesi sen, nesti periodu confirmaróse casos n'otros 20 centros residenciales.