El Pegollu de los XXXVI Andrés Solar ye pa la marca de ropa Puru Remangu

Enar Areces, creadora de Puru Remangu, recibió de la Xunta pola Defensa de la Llingua Asturiana (XDLA) el Pegollu del XXXVI Premiu Andrés Solar, que nun va contar con gala pola COVID-19 nin Madreñazu al ser “testimoniales” les posiciones en contra del asturianu. Esta marca comprometida usa l’idioma nos sos diseños.

Nacida en Madrid “de la necesidá” d’Areces “de volver a coneutar con Asturies dempués de 11 años fuera”, Puru Remangu tien sede agora en Xixón, convirtiéndose nuna firma mui nomada poles sos creaciones y iniciatives más allá de la moda, como la campaña #30DíesConRemangu que llevó a la espublización recién del llibru ‘Güeli’. El xuráu del Andrés Solar “valoró de manera mui positiva l’usu de la nuestra llingua na imaxe, nes campañes y nos diseños reivindicativos, feministes y modernos que faen de Puru Remangu una marca reconocible y reconocida, yá tamién fuera d’Asturies”, amás del so apueste pol asturianu que se pudo ver nes sos redes sociales, coneutando “cola xente más mozo con iniciatives cuasi virales”.

La organización cívica rescampla'l númberu altu y variedá de candidatures d’esti añu, “lo que ye un signu mui positivu de la vitalidá de la reivindicación llingüística n’Asturies y de la voluntá de tantos asturianos y asturianes de vivir y trabayar n’asturianu”. D’igual forma, tampoco nun va haber Madreñazu esti añu, el premiu negativu, porque “les posiciones en contra de la reconocencia de derechos pa los falantes de les llingües d’Asturies son yá testimoniales y nun merecen un minutu más de protagonismu”.

“Gustaríame dedica-y esti premiu a tola xente que ta emigrada igual que lo taba yo va cuasi un añu y que tán naguando por tornar a casa y poder facer una vida n’Asturies”, espresó Areces al recibir el Pegollu en manes de responsables de la XDLA. Esti añu nun pudo facelo de manera presencial nel Antiguu Institutu, como ye vezu, de manes de la familia de Solar, l’escritor de Deva que nos dexó n’accidente de tráficu nel 1984 a los 29 años d’edá y pon nome a los gallardones, por mor de la situación sanitaria pola pandemia de COVID-19.

Sicasí, la XDLA tien preparáu un “videu especial” que va presentar mañana a les 20 hores na so canal de YouTube y en redes sociales. “Queden pocos díes pa dexar atrás esti añu 2020, tan complicáu en tantos aspectos. La XDLA espera cuntar col apoyu de la ciudadanía pa llograr que sia l’últimu ensin oficialidá. Esti 2021 tien que ser el de la movilización que valte los últimos estorbos pal reconocimientu de la oficialidá”, apunta’l coleutivu.