“De nós va depender que la tercer fola sía más mortal o non que la segunda”, apunta Barbón

Con una tercer fola de COVID-19 “que paez que será inevitable que llegue nel mes de xineru”, el presidente Adrián Barbón llamó a la responsabilidá a les asturianes y asturianos pa evitar la mortalidá alta sufrida na segunda. L’ameyoramientu de los datos llevó al Gobiernu a permitir la reapertura de la hostelería’l llunes con restricciones y, dende esti xueves, l’actividá cultural presencial.

Tomando como exemplu lo que se ta vivendo estos díes n’Estaos Xuníos depués de la celebración del Thanksgiving Day, costume que nesti país tien llugar el cuartu xueves de payares, Barbón recordó a la ciudadanía que “de nós, de caún de nós, de cada asturianu y asturiana, va depender que la tercer fola sía más mortal que la segunda”. “Siento munches vegaes dicir eso de que ‘hai que salvar la Navidá’. Non, lo que tenemos que facer ye que naide nun pierda la vida por culpa d’una mala Navidá”, espresó, pa lo que encamienta a “evitar axuntamientos, reducir los contautos estrechos, usar la mázcara de manera correuta inclusive nel ámbitu familiar, evitar llugares zarraos que nun tán bien ventilaos y, a ser posible, faigamos actividaes esteriores, pero ensin correr riesgos”.

El presidente, na so intervención tres l’aconceyamientu del Comité de Crisis de la COVID-19 de la tarde d’ayeri, tamién destacó la importancia de contar con unos presupuestos al calificar a éstos como la “principal midida que vamos a disponer los asturianos y asturianes pa combatir nel añu 2021 al coronavirus y da-y una respuesta sanitaria económica y social con tola fuercia”, llanzando asina un mensaxe al restu de formaciones polítiques. Nesis sen, agradeció’l diálogu “sinceru” d’IX, Foro, Ciudadanos y Podemos “pa texer un gran alcuerdu tresversal pa pensar n’Asturies perriba de cualquier otra cosa”.

Una incidencia a 7 díes de 114,7

“Les midíes dures funcionen, como nos dicíen los epidemiólogos, los espertos”, aseguró Barbón, que cifró en 262,5 la incidencia acumulada a 14 díes cada 100.000 habitantes, que nel casu d’a 7 díes ye de 114,7, según confirmó Pablo Ignacio Fernández Muñiz, conseyeru de Salú, darréu. Unes midíes que, añadió, “consiguieron salvar cientos de vides” y evitar el colapsu del sistema sanitaria.

La baxada de casos lleva al Gobiernu a revisar les restricciones esistentes vixentes hasta’l día 18. Asina, el llunes, día 14, va permitise l’apertura de la hostelería, con restricciones, y a retrasar el toque de queda a les 23 hores.

Los chigres van tener que priorizar los esteriores, inutilizar les barres y permitir un máximu de 4 persones per mesa. Nun va haber porcentaxes d’aforu, pero la distancia ente éstes, tomando como referencia les sielles, ha de ser de 2 metros.

El llunes tamién va abrir tol comerciu que nun taba yá activu, con un 30 por cientu d’aforu, y torna l’actividá física en llugares zarraos, siempre con restricciones, anque les competiciones actives van siguir ensin públicu, ente elles la Copa de fútbol, coles visites del Celta y l'Alcorcón la selmana próxima pa enfrentase al Llanera y al CD Lealtad, de manera respeutiva. Por contra, l’actividá cultural presencial torna yá dende güei.

Semeya obra d'Armando Álvarez.