El miércoles detectáronse 222 positivos de COVID-19

La tasa de positividá asítase nel 5,66 por cientu nuna xornada con 18 muertes.

A la espera de los datos oficiales de la COVID-19, la Conseyería de Salú comunicó la detección de 222 positivos ayeri. Son 14 menos que'l martes.

Con 5.670 pruebes PCR feches, la tasa de positividá quedó nun 5,66 por cientu, superior a la del día anterior, del 5,18 por cientu. Les cifres de los últimos díes asítiense al rodiu del 5 por cientu, llende que marca la Organización Mundial de la Salú (OMS) pa tener controlada la pandemia.

Hai que llamentar la muerte de 18 persones: diez muyeres de 95, 92, 92, 87, 87, 85, 81, 77 y 75 años, y ocho homes de 94, 92, 89, 86, 81, 76, 72 y 69, de los que ocho teníen residencia en centros de mayores. Yá son 1.056 los finaos dende que principió l'andanciu.

Hai hospitalizaos 634 pacientes con confirmación o sospecha de COVID-19, amás d'otros 133 na UCI. Son 61 y 1 menos con respeuto al martes, de manera respeutiva.

40 biltos activos

Asturies informó al Ministeriu de Sanidá de la esistencia de 40 biltos activos, 26 menos qu'hai una selmana, que sumen un total de 1.023 casos. 8 d'ellos detectáronse estos 7 díes últimos, comunica Salú.