El PAS califica de "estafa" la mengua del tiempu de validez de les ITV pola pandemia de COVID-19

Cifra en 45.000 los asturianos afeutaos y esixe al Gobiernu "que tome les midíes oportunes".

"Como ye sabío una orde inespicable de Sanidá nos primeros meses de la pandemia restrinxó la duración de les revisiones de la ITV, estableciendo la mesma dende'l tiempu –retrasáu pol so pieslle– en que se fixera hasta'l momentu nel que debería facese, restando asina dellos meses a cada revisión ensin cobrar menos por ello", esplica'l Partíu Asturianista (PAS). El Supremu anuló llueu la mesma, polo que s'empezó, a partir d'esa sentencia, a dar validez a les tarxetes pol periodu plenu, anque ensin efeutu retroactivu "siendo'l valor d'esa suspensión universal".

El PAS denuncia qu'esta situación qu'afeuta "a 45.000 asturianos, particulares y profesionales" y considera que ye "una interpretación tramposa de la llei, guiada sólo por una bulimia contable". Asina, esixe les midíes oportunes al "Gobiernu de Barbón".

Na semeya, ITV de Xixón.