Constitúise’l Comité Asesor de Fondos Europeos, que yá trabaya nel conteníu del mapa d’estratexes d’Asturies

Los integrantes del Comité Asesor de Fondos Europeos, que se constituyó esti xueves, tienen quince díes de plazu pa presentar suxerencies al mapa d’estratexes d’Asturies. El documentu ellaboráu pol Gobiernu pa optar a los fondos europeos de reconstrucción va aprobase nel aconceyamientu siguiente d’esti órganu.

Esti documentu va constituyir la fueya de ruta del país pa tener accesu a los distintos fondos qu'Europa va habilitar pal arreglu de los daños económicos y sociales provocaos pola pandemia de COVID-19, empecipiar la recuperación, crear emplegu y amenorgar la desigualdá, según manifestó'l vicepresidente y conseyeru d'Alministración Autonómica, Mediu Ambiente y Cambiu Climáticu, Juan Cofiño, que presidió’l Comité. “Son llinies rellacionaes, principalmente, cola transición enerxética, la economía verde, la dixitalización o'l retu demográficu, ente otres”.

Los miembros d'esti órganu van contar con quince díes pa presentar les sos considerancies y suxerencies sobre'l mapa diseñáu pol Executivu, qu'afita les llinies de trabayu prioritaries, acordies col plan del Gobiernu estatal y los criterios de la Xunión Europea. Amás de Cofiño, que tuvo acompañáu pola conseyera de Facienda, Ana Cárcaba, na so calidá de vicepresidenta del nuevu órganu asesor, participaron los representantes de los sindicatos UXT y CC OO, l’Asociación Española de Municipios Mineros del Carbón (ACOM), la Federación Asturiana de Conceyos (FACC), FADE, les Cámaras de Comercio y la Universidá d’Uviéu hasta sumar 16 vocales, ocho escoyíos pol Conseyu de Gobiernu y otros tantos pola sociedá civil.

Nel primer grupu atópense Nieves Roqueñí, viceconseyera de Mediu Ambiente y Cambio Climático; Jorge García López, viceconseyeru d’Infraestructures, Movilidá y Territoriu; Elena Llorente, direutora xeneral de Calidá, Tresformación y Xestión del Conocimientu de la Conseyería de Salú; Javier Vila, direutor xeneral d’Asuntos Europeos; Rosana Prada, direutora xeneral d’Industria; Belarmina Díaz Aguado, direutora xeneral d’Enerxía, Minería y Reactivación; Fermín Bravo, direutor xeneral de Vivienda y Iván Aitor Lucas del Amo, direutor xeneral d’Innovación, Investigación y Tresformación Dixital. Complenten hasta los 16 vocales Guillermo Orejas y Alberto González Menéndez, a propuesta de Fade; Javier Fernández Lanero, d’UXT; José Manuel Zapico, de CC OO; José Manuel Ferreira, de les Cámaras de Comercio, Industria, Servicios y Navegación; Cecilia Pérez Sánchez, de la FACC; Carolina Morilla, de l’ACOM; y el rector Santiago García Granda, de la Universidá d’Uviéu.

Presencia del conseyeru de Ciencia

Nesti primer aconceyamientu acudió tamién el conseyeru de Ciencia, Innovación y Universidá, Borja Sánchez, qu'esplicó, xunto col vicepresidente y la titular de Facienda, el conteníu del mapa. L'oxetivu final ye que les propuestes coles qu'Asturies aspira a captar fondos de programes como Next Generation EU, que va movilizar 140.000 millones d'euros, s’enmarquen nesti documentu y xeneren emplegu sostenible y calidable.

El mapa sienta les bases d'un modelu nuevu p'Asturies, con un horizonte ente 2021-2030 y más de 100 oxetivos, ente los que s'inclúin el tresformamientu de la industria tradicional hacia un sistema eficiente enerxéticamente y non contaminante, mesmo que l'impulsu de nuevos xacimientos industriales venceyaos al ámbitu teunolóxicu, la biomedicina, la economía de l’agua, l'hidróxenu o los residuos.

“Tenemos qu'aprovechar toos estos recursos estraordinarios, incluyíos tamién los fondos de transición xusta y el restu d'ayudes de la Xunión Europea, evitando la so dispersión; esto ye, optimizándolos nesti mapa d'estratexes con proyeutos onde participe la sociedá asturiana”, indicó Cofiño. Coles mesmes, destacó que les iniciatives que s’alcuerden ente'l sector públicu y l'iniciativa privada son les que meyor perfil van tener, tanto dende'l puntu de vista de la financiación como de la tramitación, “porque s'entiende que van xenerar un efeutu multiplicador”.

El conseyeru remarcó que na financiación de los proyeutos va primar la calidá, el valor acordies coles llinies estratéxiques que se planteguen y la bona xestión de los fondos”. La función del comité asesor ye orientar al Gobiernu nel análisis de les iniciatives que pueden aspirar a los fondos europeos, mesmo que potenciar el diálogu social y afondar na busca d'oportunidaes y de víes de financiación.

Esti órganu, xunto cola Oficina de Proyeutos Europeos y el Mapa d'Estratexes d'Asturies, conformen la estructura alministrativa que dota al país de la ferramienta necesario pa llograr el máximu rendimientu de les ayudes.

Na semeya, Cárcaba, Cofiño y Sánchez presiden el primer aconceyamientu del Comité Asesor de Fondos Europeos.