La XDLA abre la receición de candidatures pa los XXXVI Andrés Solar

Los ciudadanos pueden unviar al coleutivu cívicu propuestes razonaes tanto pal Pegollu como pal antipremiu, el Madreñazu.

Los XXXVI Premios Andrés Solar, en memoria del escritor de Deva fináu n’accidente de tráficu nel 1984 a los 29 años d’edá, busquen candidatos. Depués de que nel 2019 la Xunta pola Defensa de la Llingua Asturiana (XDLA) decidiese entregar el Pegollu, la vertiente positiva de los gallardones, a la so familia, nun eventu priváu pa militantes celebráu en xineru, pa esta edición torna al so formatu habitual.

Hasta'l 30 de payares ye posible unviar candidatures razonaes al corréu electrónicu info@exunta.org tanto pal Pegollu, que reconoz a la persona o entidá que destacare nesti añu 2020 por normalizar l'usu del asturianu, como pa la Madreña de purpurina, a la persona o entidá que fixere tolo contrario y fore protagonista d'ataques o desprecios al idioma. Un xuráu va encargase de valorar los méritos y escoyer a los merecedores de dambos reconocimientos ente tolos posibles presentaos.

Na semeya, un momentu de la gala d'entrega de los XXXIV Premios Andrés Solar celebrada'l 21 d'avientu del 2018, la última col formatu habitual.