Les lleendes y les ayalgues protagonicen el ‘Cultures’ nuevu

La revista ‘Cultures’ de l'Academia de la Llingua Asturiana (ALLA) asoleya númberu nuevu, el 24, qu’al igual que los dos anteriores va tener una temática única. Si veníemos de monográficos sobre la música, agora esta espublización dirixida por Roberto González-Quevedo dedica’l campu d’investigación a les lleendes y les ayalgues.

‘Cultura. Revista Asturiana de Cultura’ presenta un formatu anováu qu’inxerta resúmenes y pallabres clave n’inglés nes nueve contribuciones qu’incorpora esti númberu. L’entamu del direutor da pasu a un artículu d’Alberto Álvarez Peña nel que l’investigador fai un percorríu per dalgunes ayalgues asturianes al traviés del testimoniu oral recoyíu alredor de dalgunos ayalgueros y gacetes.

Antonio Alonso de la Torre y Francisca Iglesias escriben de les tradiciones nesti ámbitu atropaes nos valles d’El Ríu de Trubia. Dende esa mesma dedicación a los espacios culturales concretos hai otres cuatro contribuciones: María Esther García López fala de los tesoros en La Montaña (Valdés) y n’Oneta (Villayón); Martin de Villar axunta delles ayalgues nel territoriu eonaviegu; y, p’acabu nesti bloque de miraes de cercanía, Xosé Antón Fernández Martínez ‘Ambás’ apurre un rellatu autoetnográficu asitiáu nel so escenariu familiar en Salcéu (Grau).

D’otra banda, Yolanda Cerra fai delles observaciones sobre Peña Tu y les lleendes d’ayalgues venceyaes al monumentu. Amalia Trancho estudia, n’otru analís tresversal, les tresformaciones alredor de la tradición de los ciprianinos.

Llueu, abriendo’l focu dende l’ámbitu asturianu, Nicolás Bartolomé Pérez fai una estensa contribución a la investigación de los manuscritos de tesoros escondíos nes tradiciones ibériques. Pa finar, Andrés Padilla Cerón fala de les lleendes d’ayalgues en Linares y Sierra Morena (Andalucía).

Alcordanza de José Luis García García

Nel apartáu de reseñes, Roberto González-Quevedo anota la obra ‘Antropología’ de Juan Oliver Sánchez. Faciendo reflexón de reuniones y xornaes d’estudiu celebraes n’Asturies nos últimos tiempos, Carlos Suari recueye l’actividá académica y cultural que se desenvolvió nel Congresu Internacional ‘Los Xuegos Tradicionales Güei’; Yolanda Cerra Bada, del ‘Tardíu en Llacín’; y Xuan Fernández Piloñeta, del Seminariu d’Estudios Asturianos de la Fundación Belenos.

Pieslla’l númberu l’alcordanza que González-Quevedo fai de José Luis García García, gran antropólogu asturianu fináu esti añu.